चितवन, ५ साउन
सिमलताल पहिरोमा परी बेपत्ता भएका दुई बस र यात्रुको खोजीका लागि भारतीय टोली चितवन आइपुगेको छ । गोताखोर चार वटा, सोनार क्यामरा तीन वटा लगायतका उपकरणसहित भारतीय टोली चितवन आइपुगेको हो।
भारतको नेसनल डिजास्टर रेस्पोन्स फोर्स (एनडिआरएफ)को टोलीलाई जिल्ला प्रशासन कार्यालयमा स्वागत गर्नुका साथै घटनाको बारेमा जानकारी गराइएको छ। १२ सदस्यीय प्राविधिक टोलीलाई प्रमुख जिल्ला अधिकारी इन्द्रदेव यादवले घटनाको बारेमा जानकारी गराएका हुन्।
असार २८ गते शुक्रबार वीरगञ्जबाट काठमाडौं आउँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौंबाट गौर जाँदै गरेको बागमती प्रदेश ०३–२४९५ ख ००१ नम्बरको गणपति डिलक्स बस चितवनको सिमलतालमा खसेको पहिरोसँगै बगेर त्रिशूली नदीमा बेपत्ता भएको थियो ।
उक्त बसमा सवार ६५ जनामध्ये ३ जना सकुशल निस्किएका थिए भने ६२ जना बेपत्ता भएका थिए । आजसम्म २३ जनाको शव विभिन्न क्षेत्रमा फेला पारिएको छ ।
अझै ३९ यात्रुको दुईवटै बसको अवस्था पत्ता लाग्न सकेको छैन । उक्त घटनाको अध्ययन गर्न गृह मन्त्रालयले गठन गरेको कार्यदलले अहिले काम गरिरहेको छ । रासस
