जकार्ता, २३ असार
इन्डोनेसियामा एक अजिंगरको पेटभित्र महिला मृतावस्थामा भेटिएकी छन् । यो घटना दक्षिणी सुलाबेसी प्रान्तको सितेबा गाउँको हो ।
इन्डोनेसियाली प्रहरीका अनुसार, गएको मंगलबार सिरियाती नामकी ३६ वर्षीया महिला आफ्नो सन्तानका निम्ति औषधि लिन घरबाट निस्केकी थिइन् । तर, फर्केर आइनन् ।
पछि उनका पति आदियांसाले अधिकारीलाई बताए कि गाउँमा आफ्नो घरको ५०० मिटरको दूरीमा उनले सिरियातीका चप्पल र कपडा भेटेका छन् ।
स्थानीय प्रहरी प्रमुख इदुलका अनुसार, आदियांसाले एक जिउँदो अजिंगर भेटे र त्यसको टाउको छिनाले ।
अजिंगरको फुलेको पेट देखेर उनलाई शंका लागेको थियो । उनले अजिंगरको पेट पनि काटे । पेटभित्र उनले आफ्नी पत्नीको शव देखे ।
यसअघि, गएको जुनको सुरुमा पनि दक्षिणी सुलावेसीको अर्को जिल्लामा पाँच मिटर लामो अजिंगरले एक महिलालाई निलेको थियो ।
अजिंगरले फेरि आक्रमण गर्न सक्ने भएकाले सबैको साथमा एउटा चक्कु राख्न प्रहरीले स्थानीय बासिन्दालाई सुझाव दिएको छ । बीबीसी हिन्दीबाट ।
