चितवन, असार १४-
नेकपा एमालेले आज जननेता मदन भण्डारीको ७३औँ जन्मजयन्ती मनाउँदैछ। जन्मजयन्तीको अवसरमा मदन भण्डारी फाउण्डेसनले विविध कार्यक्रम आयोजना गर्दै आएको छ।
भण्डारीको जन्मजयन्तीको अवसरमा नेकपा एमाले जिल्ला कमिटी चितवन र मदन भण्डारी फाउण्डेशन चितवनको संयुक्त आयोजनामा आज माडीमा वृक्षारोपण गरिँदै छ । एमाले माडी नगर कमिटीको व्यवस्थापनमा माडी–६ स्थित पुष्प मदन स्मृति बाटिकामा वृक्षारोपण कार्यक्रम राखिएको छ ।
नेकपा एमालेका तत्कालिन महासचिव भण्डारीले ‘जनताको बहुदलीय जनवाद जबजको प्रतिपादन गरेका थिए। विसं २०४९ माघ १४–२० मा सम्पन्न एमालेको पाँचौं राष्ट्रिय महाधिवेशनमा जननेता भण्डारीबाट प्रस्तुत र पारित ‘नेपाली क्रान्तिको कार्यक्रम जनताको बहुदलीय जनवाद’ अहिले पनि एमालेको मार्गदर्शक सिद्धान्तका रुपमा रहेको छ।
२००९ असार १४ गते ताप्लेजुङको ढुङ्गेसाँघुमा आमा चन्द्रकला र बुबा देवीप्रसादका माइला छोराका रुपमा मदन भण्डारीको जन्म भएको थियो।
२०५० जेठ ३ गते पार्टीको कामको सिलसिलामा पोखराबाट चितवन आउने क्रममा दासढुंगा दुर्घटनामा मदन र संगठन विभाग प्रमुख जीवराज आश्रितको निधन भएको थियो।
