चितवन, असार १३
चितवनमा रहेको अंकुरम एकेडमीका विद्यार्थीहरुले ‘अंकुरम साइन्स हाइलाइट’ प्रकाशन गरेका छन् । साइन्स हाइलाइटको बुधबार एक कार्यक्रमका बीच विमोचन गरियो । साइन्स हाइलाइटमा विद्यार्थीहरुले लेखेका ४३ वटा लेखहरु समावेश गरेर पुस्तक तयार पारिएको छ ।
साइन्स हाइलाइटका प्रमुख सम्पादक डा. आरएन धितालले साइन्स हाइलाइटको भोलुम १ प्रकाशन गरिएको बताए । उनले यो साइन्स हाइलाइट अब वर्षेनी प्रकाशन गरिने बताए । विद्यार्थीहरुलाई अनुसन्धानप्रति रुचि जगाउन साइन्स हाइलाइट प्रकाशन गरिएको उनले जानकारी दिए ।
११ र १२ कक्षाका विद्यार्थीहरुले उक्त हाइलाइटमा आआफ्नो लेख लेखेका छन् ।
यसअघिनै विभिन्न वैज्ञानिकहरुले परीक्षण गरेको कुराहरुलाई अध्ययन गरेर त्यसलाई लेखका रुपमा तयार पार्न सिकाउने उद्देश्यले पनि यो हाइलाइट तयार पारिएको उनको भनाइ छ । उनका अनुसार विभिन्न वैज्ञानिकहरुले विश्वका विभिन्न कुनामा बसेर विभिन्न वैज्ञानिक परीक्षण गर्दछन् । त्यसबाट पत्ता लागेको नयाँ कुरालाई उनीहरुले साइन्टिफिक जर्नलमा प्रकाशित गर्ने गर्दछन् ।
त्यसमध्येका इनोभेटिक कामहरुलाई छनोट गरेर हाइलाइटका रुपमा निकालिने गरिन्छ ।त्यसैअन्तर्गत अंकुरमले पनि हाइलाइट निकालेको उनले बताए ।
