चितवन, असार १२ –
स्नातक (व्याचलर) लेभल पढिरहेको उमेरमा आफ्नै व्यवसाय सञ्चालन गरिरहेकाहरु खोज्ने हो भने एकदमै कमै मात्रामा भेटिन्छन् । नेपालमा व्याचलर लेभल पढ्ने धेरैजसो विद्यार्थी घरपरिवारकै खर्चमा पढिरहेका हुन्छन् । केहीले जागिर गर्दै पढिरहेका पनि छन् । तर आफ्नै व्यवसाय नै खोलेर पढाइसँगै व्यवसायलाई अघि बढाउने विद्यार्थी कमैमात्र भेटिन्छन् ।
चितवनको वीरेन्द्र बहुमुखी क्याम्पस बिबिएस दोश्रो वर्षमा अध्ययनरत २० वर्षीय विद्यार्थी विनय आचार्यले पनि आफ्नै व्यवसाय सुरु गरेका छन् । क्याम्पसको व्यावसायिक सटरमा उनले ‘खाजा पोइन्ट’ नामक होटल सञ्चालन गरेका हुन् ।
खाजा पोइन्टको वीरेन्द्र क्याम्पस प्रमुख दायाराम पौडेलले उद्घाटन गरे । उद्घाटन गर्दै उनले बिबिएस भनेको व्यवसायसँग सम्बन्धित पढाइ भएको र उक्त पढाइलाई सीपमा ढालेको भन्दै आचार्यको प्रसंशा गरे ।
अहिले जागिर खोज्ने तर आफै केही उद्यम गर्न नखोज्ने प्रवृत्ति देखिएको अवस्थामा आफ्नै व्यवसाय खोलेर आचार्यले एक उदाहरण प्रस्तुत गरेको पौडेलको भनाइ छ ।
घरबाट बाउआमासँग पैसा मागेर ल्याएर पढ्ने अवस्था बिस्तारै कम हुँदै गएको उनले बताए । उनका अनुसार वीरेन्द्र क्याम्पसका आइटीका विद्यार्थीहरुले आइटीको समुह बनाएर आइटीको संस्था बनाएर व्यावसायिक काम गरिरहेका छन् । त्यसैगरी कुनै विद्यार्थीले ट्रेनिङ् सेन्टर खोलेका छन् । त्यसैमध्येको अर्काे खाजा पोइन्ट पनि सञ्चालन आएको बताउँदै उनले विद्यार्थीका यस्ता कामले सिंगो क्याम्पस परिवार खुसी रहेको सुनाए । यस्ता कार्य गर्न अरु विद्यार्थीहरुलाई पनि प्रेरणा मिल्नुपर्ने उनले बताए ।
आचार्यले आफ्नो पढाईलाई व्यवहारमा उतारेँ झैं अरु विद्यार्थी पनि यसरी नै लाग्नका लागि यस होटलले प्रेरणा प्रदान गर्नेमा आफू विश्वस्त रहेको पौडेलले बताए ।
विद्यार्थीले सञ्चालन गरेका व्यवसायको विकास र प्रवद्र्धनमा क्याम्पस सदैव सहयोग गर्न तयार रहेको बताउँदै उनले विभिन्न विद्यार्थी संगठनहरुलाई पनि विद्यार्थीको व्यवसायलाई प्रवद्र्धनमा सहयोग गरिदिन आग्रह गरे ।
वीरेन्द्र क्याम्पस सहायक क्याम्पस प्रमुख भोजराज गौलीले वीरेन्द्र क्याम्पसका सटरहरुमा पहिलो व्यवसायको रुपमा आफ्नै विद्यार्थीले खाजा पोइन्ट सञ्चालन गरेको प्रति खुसी व्यक्त गरे । होटलसँगसँगै आफ्नो पढाइलाई पनि राम्रोसँग निरन्तरता दिन उनले आग्रह गरे । पढ्दै कमाउँदै जुन सोच आचार्यमा विकास भएको छ यो सोच अरु विद्यार्थीहरुमा पनि आउनु पर्ने उनको भनाइ छ । व्यवसायिक सफलताको शुभकामना दिँदै उनले आचार्यबाट अरु विद्यार्थीले पनि सिक्ने वातावरण बन्नुपर्ने बताए ।
खाजा पोइन्टका सञ्चालक एवम् विद्यार्थी विनय आचार्यले आफू विगतमा अरु व्यवसायमा काम गरेको अनुभव र प्लस टु देखि नै व्यवस्थापन संकाय लिएर पढेको ज्ञानका आधारमा होटल सञ्चालन गरेको बताए । उनले सुरुमा ६ लाख लगानी गरेर होटल सुरु गरेको जानकारी गराए । परिवार र साथी भाइको साथ र सहयोगले होटल सञ्चालन गरेको उनको भनाइ छ ।
उनले चितवनको बजारमा चल्ने खाजाका अधिकांश परिकार होटलमा पाइने बताए । त्यसैगरी खानाका परिकार पनि बनाइने उनको भनाइ छ । ग्राहकको आवश्यकताअनुसार हामेडेलिभरी अर्थात ग्राहक भएकै ठाउँमा खाजा पुराउने काम पनि उनले गर्ने गरेका छन् ।
