चितवन, २३ जेठ
विश्व वातावरण दिवसको अवसर पारेर भरतपुर महानगरपालिकाले सरसफाई तथा वृक्षरोपण कार्यक्रम गरेको छ। बुधबार भरतपुर महानगरपालिकाले बाईपास सडकखण्डको बसपार्कचोकदेखि आँपटारीसम्म बृहत सरसफाई तथा वृक्षरोपण गरेको हो ।
कार्यक्रमलाई सम्बोधन गर्दै महानगर प्रमुख रेनु दाहालले भरतपुरलाई हरियाली र सुन्दर सहर निर्माण गर्न सबै पक्ष जुट्न आग्रह गर्नुभएको थियो। प्रमुख दाहालले विभिन्न प्रजातिका फलफूलको विरुवा रोप्दै वातावरण संरक्षण र दिगो विकासमा सबैको सामूहिक सहभागीता हुनुपर्ने बताउनुभयो ।
कार्यक्रममा बोल्दै उपप्रमुख चित्रसेन अधिकारीले भरतपुर भ्रमण वर्ष २०२४ लाई सफल बनाउन सरसफाई कार्यक्रम महत्वपूर्ण हुने उल्लेख गर्नुभयो ।
कार्यक्रममा स्काउट, नेपाली सेना, नेपाल प्रहरी र सशस्त्र प्रहरी र स्कुलका विद्यार्थी लगायतको उपस्थिति रहेको थियो ।
भरतपुर महानगरपालिकाले महानगरका २९ वटै वडामा आज वृक्षरोपण गरी वातावरण संरक्षण सम्बन्धी जनजागरण सुरु गरेको छ ।महानगरपालिकाले बाईपास सडकखण्डमा ६ सय बढी विभिन्न जातका विरुवाहरु रोपेको छ ।
