चितवन, २० वैशाख-
भरतपुर महानगरपालिकाको निजि क्षेत्रसँग सहकार्यको नीति अन्तर्गत भरतपुर महानगरपालिका र मुद्रण संघ–चितवनको संयुक्त आयोजनामा ‘एक महिने मुद्रण सम्बन्धी तालिम’को उद्घाटन भएको छ ।
स्थानीय सरकार भरतपुर महानगरपालिकाको वार्षिक योजना अन्तर्गत महानगर क्षेत्र भित्रका २० जना प्रशिक्षार्थी छनौट गरी मुद्रण सम्बन्धी तालिमको सुरुवात गरिएको हो । मुद्रण संघ–चितवनद्वारा २०८१ बैशाख २० गते एक औपचारिक कार्यक्रमको आयोजना गरी प्रमुख अतिथि भरतपुर महानगरपालिकाको स्वास्थ्य तथा सामाजिक विकास महाशाखा प्रमुख शान्ताकुमारी पौडेल एवम् विशिष्ट अतिथि नेपाल मुद्रण उद्योग महासंघका निवर्तमान अध्यक्ष खोमकान्त रेग्मीबाट संयुक्त रूपमा कार्यक्रमको उद्घाटन गरिएको थियो ।
कार्यक्रममा सहभागी वक्ताहरूले देश अहिले तिब्र गतिमा श्रमिक क्षयिकरणको दिशातर्फ उन्मुख रहेको बताउनु भएको थियो । मुद्रण व्यवसाय तथा मुद्रण उद्योगको क्षेत्रमा प्राविधिक जनशक्ति जस्तैः ग्राफिक डिजाइनर, मेशिन अपरेटर, लेमिनेटर, कटिङ्ग मेनहरूको अझ ठूलो अभाव रहेको र विकसित मुलुकहरूमा यो क्षेत्रमा काम गर्न सक्ने जनशक्ति उत्पादन गर्न राज्यबाटै स्पष्ट नीति निर्माण भई कार्यान्वयन भइरहेको अवस्थामा हाम्रो जस्तो देशमा हामी व्यवसायीहरू आफैं एउटा विश्वविद्यालय नै बन्नु पर्ने स्थिति रहेको कुरा समेत मुद्रण व्यवसायीहरूले राखेका थिए ।
दक्ष जनशक्ति विदेशिदैं गएका कारण देशका कल कारखानामा जनशक्तिको अभाव अन्त्यन्तै विकराल रूपमा बढेको सन्दर्भमा चितवनको मुद्रण क्षेत्रले हालसम्म कुनैपनि सरकारी तालिम तथा सेमिनारहरू बिना नै अदक्ष जनशक्तिलाई अर्धदक्ष र अर्धदक्षलाई दक्ष जनशक्तिमा परिणत गर्दै चितवनका मुद्रण उद्योगीहरूले आफु स्वरोजगार हुँदै झण्डै डेढ अर्बको लगानीमा मुद्रण उद्योगहरू सञ्चालन गरी करिब १००० को हाराहारीमा प्रत्यक्ष रोजगारीको सिर्जना गरिएको कुरा मुद्रण संघ–चितवनका अध्यक्ष सन्दिप सुवेदीले जानकारी गराउनु भएको थियो ।
साथै यस १ महिने मुद्रण तालिम कार्यक्रममा सहभागी हुने प्रशिक्षार्थीहरूलाई मेशिन औजारको सामान्य प्राविधिक ज्ञान सहित मुद्रण उद्योगहरूबाट उत्पादन हुने सामानहरू तयार गर्नसक्ने जनशक्ति बनाउन सकिने अपेक्षा मुद्रण संघले लिएको र तालिममा सहभागी प्रशिक्षार्थीहलाई क्रमिक रूपमा रोजगारी समेत प्रदान गरिने संघका अध्यक्ष सुवेदीले बताउनु भएको थियो ।
विभिन्न आरोह–अवरोहहरूसँग जुध्दै स्थानीय सरकारका नीति नियमहरू मान्दै, कठिनताका साथ जनशक्तिको व्यवस्थापन गर्दै आजसम्म यस क्षेत्रका मुद्रण व्यवसायीहरूले आफ्नो व्यवसाय सञ्चालन गर्दै आइरहेका र स्थानीय सरकार भरतपुर महानगरपालिकाबाट आगामी दिनमा यस्तै स्वरोजगारमूलक तालिमको लागि स्पष्ट नीति बन्ने विश्वास लिदैं यस्ता तालिमहरूबाट निजि क्षेत्रले पर्याप्त दक्ष जनशक्ति पाउनेछ भन्ने कुरामा मुद्रण व्यवसायीहरूले एकमतका साथ कार्यक्रममा राखेका थिए ।
मुद्रण संघ–चितवनका अध्यक्ष सन्दिप सुवेदीको अध्यक्षतामा सम्पन्न भएको सो उद्घाटन कार्यक्रममा नेपाल मुद्रण उद्योग महासंघका द्वितीय उपाध्यक्ष मनोज जिसी, महासंघका महासचिव अर्जुनप्रसाद सापकोटा, गैरसरकारी संस्था समन्वय शाखाका प्रमुख रक्ष्मी पौडेल, मुद्रण व्यवसायी साकोसका अध्यक्ष विनय कुमार श्रेष्ठ, गैरसरकारी संस्था समन्वय शाखाका अधिकृत पञ्चमाया तामाङ अतिथि रहनु भएको थियो । मुद्रण संघ चितवनका पूर्व अध्यक्षहरू, कार्य समितिका सदस्यहरु, प्रशिक्षार्थीहरु तथा उल्लेख्य रुपमा मुद्रण व्यवसायीहरुको उपस्थिति रहेको उक्त कार्यक्रम संघका सचिव उत्तम अर्यालले सञ्चालन गर्नुभएको थियो ।