चितवन, १७ वैशाख
भरतपुर महानगरपालिका भित्रका सरकारी विद्यालयहरुमा राष्ट्रिय स्वतन्त्र पार्टी (रास्वपा) चितवनले अनुगमन गरेको छ ।
आइतबार शिक्षा मन्त्री सुमना श्रेष्ठको स्वकीय सचिव कृष्ण हरि पौडेल, चितवन जिल्ला सभापति कृष्ण प्रसाद भुसाल, भरतपुर महानगर सभापति सिता ज्ञावालीसहितको टोली विद्यालय मै पुगेर अनुगमन गरेको हो ।
भरतपुर भित्रका रामनगर माध्यमिक विद्यालय, लक्ष्मी माध्यमिक विद्यालय, भरतपुर माध्यमिक विद्यालय, प्रेमवस्ती माध्यमिक विद्यालयमा अनुगमन गरिएको महानगर सभापति सिता ज्ञावालीले जानकारी दिइन् । उनका अनुसार शिक्षामा हुने बेथिति, समस्याहरु र सामुदायिक विद्यालयको शैक्षिक गुणस्तरका सवालमा विद्यालयलका प्रधानाध्यापकहरुसंग छलफल गरिएको थियो ।
त्यसपश्चात विद्यालयहरुको गुनासो लिएर भरतपुर महानगरपालिका शैक्षिक प्रशासन महाशाखा प्रमुख महेन्द्र पौडेलसंग छलफल गरिएको थियो । सामुदायिक विद्यालयको शैक्षिक गुणस्तर सुधार गर्न आफु निरन्तर लागि परेको पौडेलले बताए ।
यसअघि रास्वपाले भरतपुर अस्पताल, यातायात कार्यालय र रेडक्रसको कार्यलयमा हुने अवैध क्रियाकलाप, बेथिति र समस्याहरुप्रति सम्बन्धित कार्यालयमै पुगेर ध्यानाकर्षण गराएको थियो ।