काठमाडौँ, १५ वैशाख
धेरैजसो मधुमेह लागेको बिरामीले चामलको भात नखाएर गहुँ तथा मकैको ढिँडोे खाने चलन छ तर यसरी चामलको भात नखाए धेरै ढिँडो मात्र खानु उचित नभएको चिकित्सकहरुको भनाई छ ।
मधुमेहका बिरामीले पनि सामान्य व्यक्तिले खाने सन्तुलित खाना नै खान मिल्छ तर खानामा कार्बोहाईड्रेडको मात्रा भने नियन्त्रणमा राख्नुपर्छ ।मुख्य रुपमा सजिलै चिनी निस्किने खालको कार्बोहाईड्रेड नभएको खाना खानुपर्छ । ग्लाईसिरिन इण्डेक्स कम भएको खानेकुरा खानु उत्तम हुन्छ । जस्तै रोटी, भात (ब्राउन राईस) उत्तम हुन्छ । मकैको ढिलोमा भने भातभन्दा पनि बढी ग्लाईसिरिन इण्डेक्स भएको हुन्छ कतिपय मधुमेहका बिरामीको भात नखाएर मकैको ढिलो खाने चलन छ यो उपयुक्त होइन ।
मधुमेहका बिरामीहरुले खाने खानामा एकरुपता हुनु पर्दछ । जस्तै बिहानको खानामा म यति कार्बोहाईड्रेड भएको खान्छु भन्ने निश्चित गर्नुपर्दछ । कहिले बढी खाने कहिले कम खाने गर्नु हुँदैन । त्यसैगरी दिउँसोको खाजा कति खाने भन्ने निश्चित गर्नुपर्छ । बेलुकाको खानामा धेरै अन्न खानुपर्ने हुँदैन । त्यसैले मधुमेहका बिरामीलाई दुईदेखि तीन पटक अन्न खान राम्रो हुन्छ ।
फलफूलहरु पनि ग्लाईसिरिन इण्डेक्सको आधारमा खान सकिन्छ । केही फलफूलहरुले धेरै नै सुगरको मात्रा बढाउँछन् । जस्तै आँप, लिची, केरा लगायतका फुलफूलहरुले सुगरको मात्रा धेरै बढाउँछन् ।
खानपान र व्यायामको अभावमा मधुमेह भएको छ र सुरुवाती चरणमै छ भने त्यसलाई मेन्टेन गर्न सकिन्छ । एजेन्सी
