भरतपुर , ८ बैशाख
भरतपुर महानगरपालिकाले विज्ञापन कर नतिर्ने बिदेशी कम्पनीका बोर्डहरु हटाउन सुरु गरेको छ । महानगरले आज शनिबारदेखि नारायणगढ बजारबाट बोर्डहरु हटाउन सुरु गरेको हो । महानगर प्रहरी र प्रनिस कन्सट्रक्सनका प्रतिनिधिहरुले बोर्ड हटाएका हुन् ।
सार्वजनिक स्थान र पसलहरुमा राखिएको विज्ञापन बोर्डको कर महानगरले कर उठाउने जिम्मा प्रनिस कन्सट्रक्सनलाई दिएको छ ।
कन्सट्रक्सनले पटक पटक ताकेता गर्दा पनि कर तिर्न अटेर गरेपछि बोर्ड हटाइएको प्रनिस कन्सट्रक्सनका बजार प्रतिनिधि दिपक घिमिरेले जानकारी दिए ।उनका अनुसार कन्सट्रक्सनका प्रतिनिधिसहित महानगर प्रहरीले बाल्ट्रा, सुपर जनरल, होम ग्यालरी, डायमण्ड लगायतका कम्पनीको विज्ञापनजन्य बोर्डहरु हटाएको हो । कम्पनीहरुले महानगरलाई कर नतिरेसम्म विज्ञापन बोर्ड राख्न नदिने उनले बताए ।
पहिलो चरणमा अन्तर्राष्ट्रिय कम्पनीका बोर्ड हटाउने र दोश्रो चरणमा राष्ट्रिय कम्पनी, वित्तीय सस्था, शैक्षिक सस्था लगायका संघसस्थाको विज्ञापनजन्य बोर्ड हटाउने कन्सट्रक्सनले जनाएको छ।
अन्तर्राष्ट्रिय कम्पनीका ब्राण्डहरुले भरतपुरका विभिन्न पसल र सडकहरुमा विज्ञापनजन्य बोर्ड राखेर आफ्नो विज्ञापन गरिरहेका छन् ।