चितवन, २५ चैत
शिक्षकहरुको आन्दोलनले नियमित रुपमा पठनपाठन नभएको भन्दै माडी क्याम्पसमा संयुक्त विद्यार्थी संगठनहरुको ध्यानाकर्षण भएको छ ।
आज स्ववियु अध्यक्ष राकेश चौधरी, अखिल क्रान्तिकारी अध्यक्ष रवि भुर्तेल, अनेरास्ववियु अध्यक्ष सुर्य भण्डारी, ने.वि.संघ सभापति सुरज लामिछाने र अनेरास्ववियूका अध्यक्ष गौरव अधिकारीले संयुक्त विज्ञप्ति जारि गर्दै विरोध जनाएका हुन् ।
विज्ञप्तिमा भनिएको छ, “नेपालको संबिधान २०७२ को धारा ११ मा कुनै पनि प्रावधान विना शिक्षा पाउनुपर्ने हकको व्यवस्था हुँदाहुँदै पनि क्याम्पसमा पढ़ाई नभएको कुरालाई क्याम्पस प्रशासनले नजरअन्दाज गरेको र विद्यार्थीहरु दैनिक रुपमा आफ्नो अमूल्य समय खर्च गरेर आउने तर क्याम्पसमा कुनै शिक्षा आर्जन नगरी फर्कनु परेको तितो यथार्थ प्रति क्याम्पस प्रशासनको गम्भिर रुपमा ध्यानाकर्षण होस्। ”
नियमित रुपमा क्याम्पसमा पठनपाठन गराउन विद्यार्थी संगठनहरुले आग्रह गर्दै प्रशासनलाई २४ घण्टे अल्टिमेटम दिएका छन्। विद्यार्थीहरुको शान्तिपूर्ण आग्रहलाई क्याम्पसले वेवास्ता गरि समस्या समाधान नगरेमा चरणबद्ध आन्दोलनका कार्यक्रमहरु घोषणा गरिने विज्ञप्तिमा उल्लेख गरिएको छ ।
विगत लामो समयदेखि माडी क्याम्पसका शिक्षकहरु आन्दोलनमा छन् । न्यून तलबमा काम गरेका प्राध्यापक कर्मचारीहरुको सेवा सुविधा कटौती गर्ने निर्णय फिर्ता लिनुपर्ने, तलब स्केल न्यूनतम मावि द्वितीय श्रेणीको शिक्षक सरह कायम हुनुपर्ने, क्याम्पसमा गरिने निर्णयहरु क्याम्पसको विधान तथा क्याम्पस सञ्चालन कार्यविधिभित्र रही गर्नुपर्ने लयायतको माग राखी शिक्षकहरु आन्दोलनमा उत्रिएका हुन् ।
शिक्षकहरुको माग पूरा नभएसम्म क्याम्पसकाे पठनपाठन बन्द रहने शिक्षकहरुले जनाएका छन् ।
