चितवन, २१ चैत
भरतपुर महानगर आधारभूत तह परीक्षा समितिको निर्णयप्रति अनेरास्ववियु चितवनले ध्यानाकर्षण भएको जनाएको छ ।
नेकपा एमाले निकट अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) जिल्ला कमिटीले महानगरको शैक्षिक प्रशासन महाशाखाले कक्षा ८ को स्वास्थ, शारीरिक तथा सिर्जनात्मक कला विषयको पुन: परीक्षा लिने भनी गरेको निर्णय खारेज गर्न माग गरेको हो ।
आज जिल्ला अध्यक्ष हरि आचार्यसहितको टोलीले भरतपुर महानगरपालिका शैक्षिक प्रशासन महाशाखा,आधारभूत तह परीक्षा समितिलाई विज्ञप्ति बुझाउँदै सो माग गरेको हो ।
विज्ञप्तिमा भनिएको छ, “परीक्षा सकिए लगत्तै विदा मनाउन विद्यार्थीहरू पारिवारिक भ्रमण तथा घुमघाममा जिल्ला तथा देश बाहिर समेत निस्किएको अवस्था विद्यमान रहेकोले पुन: परीक्षा संचालनको सम्भावना नरहने हुदा उक्त निर्णय खारेज गरी आन्तरिक मुल्यांकन विधिबाट समस्याको समाधान गर्न आग्रह गर्दछौं ।”
विज्ञप्तिमा थप भनिएको छ, विद्यार्थीबाट परीक्षा दिन छुटेमा उक्त परिक्षामा सहभागी हुन १ बर्ष कुर्नुपर्ने तर महानगरले गल्ती गर्दा महानगरले नै आफु अनुकुल गर्ने गरि गरिने निर्णय कठोर तानाशाही प्रवृत्ति हो । शैक्षिक प्रशासन महाशाखा र परिक्षा समितिको नालायककीपनले विद्यार्थीहरूको कलिलो मस्तिष्कमा आघात चोट पर्ने अवस्थालाई मध्येनजर गर्दै कर्मचारीले गल्ती गरिरहने र विद्यार्थीहरू त्यसको भागिदार हुनुपर्ने विडम्बनापूर्ण अवस्था सृजना नगर्न अनेरास्ववियु जिल्ला कमिटी चितवन अनुरोध गर्दछ । यस प्रकारको गल्तीले विद्यार्थीलाई अनावश्यक हैरानी, मानसिक तनाब र उनिहरूको भबिष्यमाथि नै खेलवाढ गर्ने माथि छानवीन गरी सार्वजनिक रूपमा कार्वाही गर्न जोडदार माग गर्दछौं ।”
महानगरले अनेरास्ववियुको शान्तिपूर्ण आग्रहको वेवास्ता गरिएमा जस्तोसुकै सशक्त संघर्षमा उत्रन बाध्य हुने चेतावनी अनेरास्ववियुले दिएको छ ।
चैत १९ गते महानगरले एक सुचना जारि गर्दै कक्षा ८ को स्वास्थ, शारीरिक तथा सिर्जनात्मक कला विषयको प्रश्नपत्र निर्माणमा त्रुटि भएको भन्दै पुन परिक्षा सञ्चालन गर्ने निर्णय गरेको थियो ।
भरतपुर महानगरपालिकाले लिएको कक्षा ८ को आधारभूत तह परीक्षाको एक विषयको प्रश्नपत्र प्याब्सन भरतपुरले लिएको सोही विषयको आधारभूत तह पुर्ब तयारी परीक्षाको प्रश्नपत्रसँग हुबहु मिलेको थियो ।
गत चैत्र ८ गते सञ्चालित आधारभूत तह परीक्षाको स्वास्थ्य तथा शारीरिक विषयको प्रश्नहरु गत फागुन १५ मा प्याब्सन भरतपुरले सञ्चालन गरेको सोही विषयको परीक्षामा सोधिएको प्रश्नहरुसँङ ८० प्रतिशत भन्दा बढी हुबहु मिलेको पाइएको थियो ।
