चितवन, चैत १६ –
त्रिविले उत्तरपुस्तिका हराइदिएपछि चितवनस्थित वीरेन्द्र क्याम्पसका विद्यार्थीहरु पूर्वपश्चिम राजमार्ग अवरोध गरेर आन्दोलनमा उत्रिएका छन् ।
चितवनको वीरेन्द्र बहुमुखी क्याम्पस र शहीद स्मृति बहुमुखी क्याम्पसमा बीए पहिलो वर्षको जनसंख्या एवम् स्वास्थ्य विषयको पुनः परीक्षाको तालिका सार्वजनिक भएको छ । गत वर्ष परीक्षा दिएको उत्तरपुस्तिका हराएपछि त्रिभुवन विश्वविद्यालयले यही चैत्र २१ गते पुनः परीक्षा लिन सूचना जारी गरेको हो ।
उत्तरपुस्तिका पनि सुरक्षित राख्न नसक्नु त्रिविको चरम लापरवाही र गैह्रजिम्मेवारी पना भएको भन्दै आज वीरेन्द्र क्याम्पसका विद्यार्थीहरुले राजमार्गमा प्रदर्शन गरे । विद्यार्थीहरुको प्रदर्शनले करिब १५ मिनट राजमार्ग नै अवरुद्ध भएको थियो ।
नेपाली काँग्रेस निकट नेपाल विद्यार्थी सिंघ (नेविसंघ) र नेकपा एमाले निकट अखिल नेपाल राष्ट्रिय स्वतन्त्र विद्यार्थी युयिनय (अनेरास्ववियु)को संयुक्त आह्वानमा विद्यार्थीहरुले पूर्वपश्चिम राजमार्गमा प्रदर्शन गरेका हुन् ।
प्रदर्शनमा विद्यार्थीहरुले त्रिवि तेरो पाराले दुखः पाए साराले, त्रिविको लापरबाही बन्द गर, पुनः परीक्षाको मिति खारेज गर, उत्तरपुस्तिका हराउनेलाई कारवाही गर, विद्यार्थीको भविष्यमाथि खेलबाड गर्न पाईँदैन, उत्तर पुस्तिका हराउने कर्मचारी चाहिँदै लगायतका नारा लगाएका थिए ।
प्रदर्शनका क्रममा बोल्दै विद्यार्थीहरुले एक वर्षअघि दिइसकेको विषयको परीक्षा पुनः दिनका लागि पनि कम्तिममा एक महिनाको समय विद्यार्थीलाई अध्ययन गर्नका लागि छुट्याउनु पर्ने बताए । त्रिविले त्यो समय समेत नुछट्याई तत्काल परीक्षा घोषणा गरेर त्रिविले निरंकुश पारा देखाएको उनीहरुको भनाइ छ । पुनः परीक्षाको निर्णय तत्काल खारेज गरी उत्तरपुस्तिका खोज्न र नपाइएमा हराउनेहरुलाई कारवाही गर्न विद्यार्थीहरुले माग गरेका छन् । कारवाहीपश्चात केही समय राखेरमात्र पुनः परीक्षाको मिति तोक्न उनीहरुको माग छ ।
विद्यार्थीहरुको आवाजलाई नसुनि चैत्र २१ गते परीक्षाको तयारीमा क्याम्पस लागेका परीक्षा नै हुन नदिने उनीहरुले चेतावनी दिएका छन् ।
