– हिरालाल आचार्य ‘डायमण्ड’
चितवन, चैत ५ –
नेपाली काँग्रेस निकट नेपाल विद्यार्थी संघ (नेविसंघ) चितवनमा प्रकाश भण्डारीलाई कार्यवाहक अध्यक्ष मान्दैनौं भन्दै जिल्ला पार्टी सभापतिलाई ज्ञापन पत्र बुझाइएको छ ।
आज मैयादेवि कन्या क्याम्पसमा नेपाली काँग्रेस विद्यार्थी विभाग चितवनद्वारा आयोजित अन्र्तक्रिया कार्यक्रममा भण्डारीको गतिविधि प्रति असन्तुष्ट विद्यार्थी नेताहरुले नेपाली काँग्रेस चितवनका जिल्ला सभापति राजेश्वर खनाललाई ज्ञापन पत्र बुझाएका हुन् । ज्ञापन पत्र बुझाएर हलबाट अधिकांश विद्यार्थी नेताहरु बाहिरिएपछि कार्यक्रम नै विथोलिएको थियो ।
अध्यक्ष राजेश भुषाल रोजगारीका लागि ८ महिनादेखि विदेशमा छन् । उनले विदेश जाने क्रममा प्रकाश भण्डारीलाई कार्यवाहक तोकेका थिए । जसलाई नेविसंघ चितवनका सबै नेता कार्यकर्ताले स्वीकार गरेका छैनन् ।
नेविसंघ केन्द्रिय सदस्य राजन दाहाल, गणेश प्रसाद रिजाल, विजय मल्ल, संजना पौडेल, सुभाष कोइराला, कालिका नगरपालिका नेविसंघ संयोजक अशोक लामा, रत्ननगर नगरपालिका नेविसंघ संयोजक नविन थापा, नेविसंघ चितवनका नेता प्रकाश श्रेष्ठ र अमृत मिश्रले हस्ताक्षर गरेको ज्ञापन पत्रमा प्रकाश भण्डारीलाई कार्यवाहक अध्यक्ष मान्न नसकिने कुरा उल्लेख गरिएको छ । उक्त ज्ञापनपत्र प्रति नेविसंघ चितवनका अधिकांश नेताहरुको समर्थन रहेको उनीहरुले बताएका छन् । नेपाल विद्यार्थी संघ केन्द्रिय सदस्य ई.गणेश रिजालको संयोजकत्वमा ज्ञापनपत्र बुझाएको हो ।
ज्ञापन पत्रमा भनिएको छ, ‘आज नेपाल विद्यार्थी संघ चितवनको अवस्था देखेर हामी सबै चिन्तित भएका छौं, कसरी हुन्छ यो संगठनलाई सुदृद्ध, सबल, सक्षम बनाउन सकिन्छ भन्ने नै हाम्रो उद्देश्य हो । नेपाल विद्यार्थी संघ चितवनका सन्दर्भमा वर्तमान केन्द्रिय अध्यक्ष दुजाङ शेर्पाबाट आजभन्दा लगभग १३ महिना अगाडि ३ महिनाका लागि भन्दै राजेश भुषाललाई अध्यक्ष तोकेर एउटा अलोकतान्त्रिक तरिकाले निर्णय आयो ।
तर पनि हामीले संगठनको हितलाई मध्यनजर राखेर पार्टीले सबै साथीहरुलाई समेटेर छलफल गरेर अगाडि बढ्छ होला भन्ने लागेको थियो । तर अफसोच पार्टी एउटा सानो झुण्डमा रमायो । धेरै काम गरेका साथीहरुलाई पार्टी संगठनकै होइनन् जस्तो व्यवहार गरियो । त्यसकारण केन्द्रिय अध्यक्षले अधिवेशन गराउनको लागि भनेर दिएको समय पनि सकि सकेको, राजेश भुषाल आफै पनि वैदेशिक रोजगारीका लागि विदेश गएको र नेविसंघ केन्द्रिय समितिले नै चितवन जिल्ला खाली भनिसकेको हुँदा अहिलेको अवस्थामा नेविसंघ जिल्ला समिति चितवन पूर्णरुपले रिक्त रहेको अवगत गराउन चाहन्छौं ।’
ज्ञापन पत्रमा भनिएको छ, ‘विगत केही समय यता हुँदै नभएको अध्यक्षको कार्यवाहक अध्यक्ष हूँ भनि सामाजिक सञ्जाल एवम् विभिन्न सञ्चार माध्यममा देखिन आएको हुनाले उक्त गतिविधिहरु रोक्न र संगठनलाई विधि विधान सम्मत अगाडि बढाउन नेपाली कांग्रेस चितवनलाई विनम्र अनुरोध गर्दछौं । अन्यथा उत्पन्न हुने परिस्थितिको जिम्मेवारी स्वयम नेपाली काँग्रेस जिल्ला कार्य समितिले नै लिनुपर्ने छ ।’
ज्ञापन पत्रमा नेपाली कांग्रेस केन्द्रिय कार्यालय सानेपा ललितपुर, नेविसंघ केन्द्रिय कार्यालय काठमाडौं र नेपाली कांग्रेस विद्यार्थी विभाग चितवनलाई वोधार्थ उल्लेख गरिएको छ ।
नेपाली काँग्रेस चितवनका सभापति राजेश्वर खनालले तोकिएको अध्यक्ष राजेश भुषाल आफू विदेश जानेबेलामा प्रकाश भण्डारीलाई कार्यवाहक तोकेको र त्यसलाई केन्द्रले समर्थन गर्दै भण्डारीलाई नै कार्यवाहक अध्यक्ष भनि निर्णय गरेकाले पार्टीले उनैलाई अध्यक्ष मानेर अघि बढेको बताए ।
चितवन आजसँग कुराकानी गर्दै उनले भने, ‘विधान अनुसार नेविसंघको केन्द्रिय अध्यक्षले जिल्ला अध्यक्ष तोक्ने हो । अहिले चितवनको कार्यवाहक अध्यक्षका रुपमा प्रकाश भण्डारीलाई तोकेको छ । जसलाई नेविसंघको केन्द्रले जिल्लाको अध्यक्ष भनेर तोक्छ त्यसलाई पार्टीले अध्यक्ष मान्नुर्छ’ उनी भन्छन्, ‘सबै किसिमा भातृ संगठनमा त्यही नै गर्ने हो ।’
‘त्यसकारणले गर्दा पार्टीले उहाँलाई नेविसंघको जिल्ला अध्यक्षको रुपमा मानेको हो । त्यसमा केही साथीहरुले असहमति राखेर हामी यो मान्दैनौं भनेका छन् । साथीहरुको यो जवरजस्ती पन पनि हो । पार्टीमा बसेपछि पार्टी प्रणालीलाई जसले पनि मान्नुपर्छ’ उनले भने ।
ज्ञापन पत्र :
