भरतपुर, २३ फागुन
भरतपुर महानगरपालिका वडा नं-११, भोजाडस्थित वडा कार्यालयअगाडि टिप्परको ठक्करबाट गम्भीर घाइते भएका मोटरसाइकल चालकको मृत्यु भएको छ । मृत्यु हुनेमा भरतपुर-११ नवजीवन टोल बस्ने ३८ वर्षीय प्रेमबहादुर तामाङ रहेका छन् ।
टिप्परको ठक्करबाट गम्भीर घाइते भएका तामाङको उपचारको क्रममा पुरानो मेडिकल कलेजमा मृत्यु भएको हो ।
भोजाडबाट विशाल चोकतर्फ जाँदै गरेको बागमती प्रदेश ०६-००२ प ७६५ नम्बरको मोटरसाइकलमा सोही दिशातर्फ जाँदै गरेको ना ३९ प २१०२ नम्बरको मोटरसाइकल ठोक्किन गई विशाल चोकबाट भोजाडतर्फ आउँदै गरेको प्रदेश २-०३-००१ ख ३७९८ नम्बरको टिप्परले पुनः ना ३९ प २१०२ नम्बरको मोटरसाइकललाई ठक्कर दिएको थियो ।
तिनैवटा सवारी साधन र टिप्पर चालकलाई नियन्त्रणमा लिइएको प्रहरीले जनाएको छ । प्रहरीका अनुसार बागमती प्रदेश ०६-००२ प ७६५ नम्बरको मोटरसाइकल चालक भने फरार रहेका छन् ।
