भरतपुर, १८ फागुन
राष्ट्रिय स्वतन्त्र पार्टीका सभापति तथा चितवन–२ का सांसद रवि लामिछानेले मञ्चमा देखिएको नेताहरुको एकता देश रुपान्तरणमा पनि देखिनुपर्ने बताएका छन् ।
आज नारायणी किनारमा सञ्चालित भरतपुर भ्रमण वर्षको उद्घाटन कार्यक्रममा बोल्दै सभापति लामिछानेले भरतपुर महानगरमा भएका राम्रा कामहरुको प्रशंसा गर्दै भ्रमण वर्षको सफलताको शुभकामना दिएका छन् । उनले उद्घाटन कार्यक्रममा देखिएका शिर्ष नेताहरुको एकता देशको रुपान्तरणमा आवश्यक रहेको बताएका छन् ।
उनले भने, ‘मञ्चमा देखिएको कम देख्ने दृश्य हो । त्यो भन्दा राम्रो दृश्य बन्न सकोस् । राष्ट्रिय मुद्दामा एक बन्न सकौं । भविष्यका पूर्वप्रधानमन्त्रीहरु र भविष्यका प्रधानमन्त्रीहरु मञ्चमा हुनुहुन्छ । शक्ति यता छ । यहाँको शक्तिले जनताको त्यहाँको शक्तिलाई चिन्नेछ तब देशले मुहार फेर्नेछ । ’
आज नारायणी किनारमा भइरहेको भ्रमण वर्ष उदघाटना कार्यक्रममा प्रधानमन्त्री पुष्पकमल दाहाल ‘प्रचण्ड’, नेपाली काँग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली, पूर्व प्रधानमन्त्री झलनाथ खनाल, नेकापा समाजवादीका अध्यक्ष माधवकुमार नेपाल,पूर्व प्रधानमन्त्री, संघीय सरकारका मन्त्री, सातै प्रदेश प्रमुख, मुख्यमन्त्री, मन्त्रीहरू, संघ तथा प्रदेश सांसदहरुलगायत शिर्ष नेताहरुको बाक्लो उपस्थिति रहेको छ ।
