चितवन, फागुन १७ –
भरतपुर महानगरपालिकाले भरतपुर भ्रमण वर्ष २०२४ मनाउँदै छ । भोलि फागुन १८ गते भ्रमण वर्षको उद्घाटन समेत हुँदैछ ।
नारायणी नदी किनारमा भोलि हुने उद्घाटन समारोहमा प्रधानमन्त्री पुष्पकमल दाहाल ‘प्रचण्ड’ सहितका शिर्षस्थ नेताहरुको उपस्थित रहने छ । भरतपुर भ्रमण वर्ष सफल पार्नुपर्छ । यसले भरतपुरको आर्थिक चलायमान पक्कै बनाउला ।
तर भरतपुर भ्रमण वर्षका नाममा राज्यको सम्पतीको चरम दुरुपयोग भइरहेको छ । त्यसको एउटा ज्वलन्त उदाहरण आज देखिएको छ । राम्रो अवस्थामा रहेको, कुनै पनि खाल्डाखुल्डी नभएको सडकलाई आज एक्कासी पिच गरिएको छ ।
वीरेन्द्र क्याम्पस चोकदेखि विशाल चोकसम्म रहेको रोड महानगरपालिका प्रमुख रेनु दाहालको निवास जाने सडक पनि हो ।
स्थानीय आकांक्षा पोख्रेलले पिच नगर्नु पर्ने बाटो एक्कासी धमाधम पिच भएको देख्दा अचम्मित भएको बताएकी छिन् । उनले बजेट धेरै भएर अनावश्यक ठाउँमा खन्याएको भन्दै पिच गर्ने कामको विरोध गरिन् । उनले भनिन्, ‘भरतपुरकै भित्रि सडकहरु खाल्डाखुल्डी छ, धुलोधुँवा उडिरहन्छ, त्यस्तो बाटो बनाउन छोडेर पिचै गर्न नपर्ने बाटो पिच गर्दा मैले तिरेको करको दुरुपयोग भयो ।’
सोही सडक सँधै हिड्ने विद्यार्थी हरि पौडेलले पनि केही नभएको बाटो पिच भएको देख्दा अचम्मित भएको बताए । उनले पिच भएकै ठाउँमा पिच गर्नुभन्दा अन्य मर्मत गर्नुपर्ने र पिच गर्नुपर्ने सडकहरुमा पिच गर्दा राम्रो र सहज हुने बताए । उनले भने, ‘नगरप्रमुखको घर जाने बाटो मात्र मध्यनजर गरेर पिचमाथि पिच गरिएको छ ।’
नारायणगढको पुलचोकदेखि गोन्द्राङ सडक विस्तारको काममा ढिलासुस्ती हुँदा पुलचोकदेखि चौबिस कोठीसम्मको सडकको अवस्था विजोक छ । त्यस सडकको निर्माणलाई तिव्रता दिनुका साटो सडक डिभिजन चितवनका र भरतपुर महानगरपालिकाले आवश्यकता नै नभएको ठाउँमा पिच गर्नका लागि राज्य कोषको सम्पतीको दुरुपयोग गरिरहेका हुन् ।
सडक डिभिजन कार्यालय चितवनका सूचना अधिकारी चन्द्रेश्वर शाहले नियमित प्रक्रिया अन्तर्गत रहेर सडकमा नयाँ पिच थपिएको भन्दै बचाउ गरेका छन् ।
यसैगरी भ्रमण वर्षका नाममा नारायणी किनारको बालुवामा दुबो रोपेर लाखौंको दुरुपयोग गरिएको छ । यसैगरी हरेक वडामा एक लाखदेखि १ लाख ३० हजारसम्म बजेट बाँडेर भ्रमण वर्षमा सहभागी हुन भनिएको छ । यसैगरी हरेक टोलटोलबाट ब्यानर बनाउन भनिएको छ त्यसको औचित्य कति हो ? त्यसको खर्च कस्ले व्यहोर्छ ? यी यावत प्रश्न चिन्नहरु खडा भइरहेका छन् ।
अन्य थप जानकारी प्रस्तुत भिडियो उल्लेख गरिएको छ ।
