चितवन, माघ १७ –
अनेरास्ववियु चितवनले राजनीतिक खिचातानी र दाउपेचको कारण नेपाल नमुना माध्यमिक विद्यालयमा देखिएको समस्या प्रति ध्यानाकर्षण गराएको छ ।
अनेरास्ववियु चितवनका कार्यवाहक अध्यक्ष सरोज तिमिल्सिना द्वारा हस्ताक्षरित विज्ञप्तिमा सम्मानित अदालतको आदेश नमानेको र आफैले बनाएको नियमको पालना नगरेको भन्दै रत्ननगर नगरपालिका समेत अराजक गतिविधिलाई साथ दिएको आरोप लगाइएको छ ।
विज्ञप्तिमा भनिएको छ, ‘रत्ननगर नगरपालिका वडा नम्बर २ स्थित नेपाल नमुना माध्यमिक विद्यालयमा विगत लामो समयदेखि रहेको राजनैतिक खिचातानी र प्रअ नियुक्तिलाई लिएर आम विद्यार्थीलाई पर्न गएको असरप्रति हाम्रो संगठनले खबरदारी गर्दै यस अघिनै ध्यानाकर्षण समेत गर्दै आएको थियो । सम्मनित उच्च अदालत पाटन, हेटौडा इजालसबाट शिक्षक बुद्धि राज सुवेदीलाई प्रअको रुपमा काम गर्न दिनु भन्ने परमादेश मुद्दामा मिति २०८०/९/१८ गते आदेश भएको छ । सम्मानित अदालतको आदेशको बेवास्ता गरी निमित्त प्रअ तालाचाबी नबुझाइ विद्यालय प्रशासनभित्र केही अराजक व्यक्तिबाट तोडफोड गरी शैक्षिक क्षेत्र तहसनहस गरेर विद्यार्थीको पठनपाठन प्रभावित भएको र नगरपालिकाले समेत कुनै सहजिकरण नगरेको देखिदा यस अराजक गतिविधिमा नगरपालिका समेतको संलग्नता रहेको हाम्रो ठम्याइ रहेको छ ।’
रत्ननगर नगरपालिकाको शिक्षा ऐन २०७४ को संशोधनसहित दफा १२ को उपदफा १, ‘क’ मा सम्बन्धित वडाको वडा अध्यक्ष नै माध्यमिक विद्यालयमा विद्यालय व्यवस्थापन समितिको अध्यक्ष हुने बाध्यकारी अवस्था उल्लेख गरेको छ । नगरपालिका आफैले बनाएको ऐन कानुनलाई मिचेर वडा अध्यक्ष राजेन्द्र प्रसाद घिमिरेले चन ८०५ मिति २०८०/१०/१४ को पत्रबाट विद्यालय व्यवस्थापन समितिको अध्यक्षमा नियम विपरीत अन्य व्यक्तिलाई मनोनयन गरिएको पत्र सार्वजनिक भएको छ ।
जुन कार्य नियम विपरित छ । विद्यार्थीहरुको भविष्य र शैक्षिक क्षेत्र माथि गरिएको गैरजिम्मेवारी पूर्ण कार्यप्रति अनेरास्ववियु चितवन खेद प्रकट गर्दछ । यस विषयमा सत्यतथ्य छानवीन गरी दोषीउपर कडा कार्वाही सहित तत्काल निर्णय सच्चाई पिडित विद्यार्थीलाई न्याय दिलाउन सम्बन्धित सरोकारवालाहरुसँग अनेरास्ववियु जिल्ला कमिटी चितवन जोडदार माग गर्दछ ।’ विज्ञप्तिमा भनिएको छ ।
अनेरास्ववियु चितवनले विद्यार्थीमाथि भएका अन्याय, गैरजिम्मेवारीपनबाट सृजित समस्या समाधान गर्न सम्बन्धित सम्पुर्णमा अनुरोध गर्दै तत्काल विधार्थीको समस्या समाधान नभएमा, शान्तिपूर्ण आग्रहलाई वेवास्ता गरिएमा जस्तोसुकै प्रतिकार तथा सशक्त सङ्घर्षमा उत्रन तयार एंव् बाध्य हुने र त्यसबाट सृजित परिस्थितिबारे विद्यालय प्रशासन र नगरपालिका नै जिम्मेवारी रहने चेतावनी समेत दिएको छ ।
