– हिरालाल आचार्य ‘डायमण्ड’
चितवन, पुष २४
सिटिइभिटीको आंगिक शिक्षालय नारायणी बहुप्राविधिक शिक्षालय भरतपुरमा अध्ययनरत एक विद्यार्थीले आत्महत्या गरेपछि विद्यार्थीहरु आन्दोलित बनेका छन् ।
तेश्रो सेमेस्टरमा अध्ययनरत छात्रा प्रियाकुमारी जैसवालले प्रथम सेमेष्टरको नियमित परीक्षाको नतिजा आएको भोलिपल्ट आत्महत्या गरिन् ।
उनी प्राक्टिकल र थेउरी दुबैमा फेल भएपछि आत्महत्या गरेको र उक्त फेला शिक्षकहरुले लापरबाही गरेर गराइदिएको भन्दै विद्यार्थीहरु आन्दोलित बनेका छन् । आज शिक्षालयमा सयौं विद्यार्थीहरुले नाराबाजी गर्ने, प्रदर्शन गर्ने, टायर बाल्ने र केही झ्यालका सिसामा ढुंगा हानेर आन्दोलनमा उत्रिए ।
आन्दोलनरत विद्यार्थीले शिक्षालयका केही कोठामा प्रवेश गरी प्राक्टिकल रिर्पाेटहरुको फाइल फेला पारे । उक्त प्राक्टिकल रिर्पाेट चेकजाँच नै नगरिएको पाइएको छ । मृतक प्रियाकुमारी जैसवालको प्राक्टिकल रिर्पाेट पनि फेला पर्याे । उक्त प्राक्टिकल रिर्पाेट हेर्दा त्यो पनि चेकजाँच राम्रोसँग गरिएको छैन भने नम्बर पनि दिइएको छैन । हेर्दाखेरी प्राक्टिकल राम्रै गरेको देखिन्छ । तर शिक्षकहरुले चेकजाँच नै नगरी जथाभावी नम्बर दिएर फेल गराएको प्रमाण विद्यार्थीहरुले फेला पारेका छन् । त्यसलाई हामले भिडियोमा कैद समेत गरेका छौं ।
शिक्षकहरुले चेकजाँच नै नगरी जथाभावी नम्बर दिएर विद्यार्थीलाई फेल गराउँदा एक जना विद्यार्थीले ज्यान गुमाउनु परेकाले प्रियाले न्याय पाउनुपर्ने विद्यार्थीहरुले माग गरेका छन् ।
यसरी जथाभावी नम्बर दिएको कुरामा शिक्षालयले अहिले कुनै प्रतिक्रिया दिन मानेन् । मृत प्रियाको शव अहिले पोस्टमार्टमका लागि भरतपुर अस्पतालमा रहेको छ । उक्त रिर्पाेट आएपछि थप प्रतिक्रिया दिने चितवन प्रहरीले जनाएको छ ।
