चितवन, पुस २ –
राष्ट्रिय युवा संघ नेपाल भरतपुर महानगरकमिटीले भरतपुरको सप्तगण्डकी चोकमा रक्तदान कार्यक्रम सम्पन्न गरेको छ ।
बिहानैबाट सप्तगण्डकी कलेज अगाडि सुरु भएको रक्तदान कार्यक्रम दिउँसोसम्म चलेको थियो । कार्यक्रममा १०० जनाले रक्तदान गरेका युवा संघ भरतपुर महानगर कमिटीका सचिव रामचन्द्र भट्टले चितवन आजलाई जानकारी दिए ।
चितवनमा देखिएको रगतको चरम अभावलाई ध्यानमा राख्दै युवा संघले रक्तदान सुरु गरेको हो । रक्तदान कार्यक्रममा नेकपा एमाले चितवनका अध्यक्ष रामप्रसाद न्यौपानेले आफैले रक्तदान गर्दै कार्यक्रमको उद्घाटन गरे ।
राष्ट्रिय युवा संघ नेपाल भरतपुर महानगरकमिटीका अध्यक्ष राम कार्कीको अध्यक्षतामा भएको रक्तदानमा पार्टी जिल्ला उपाध्यक्ष कमलराज पाठक, पार्टी प्रदेश कमिटी सदस्यहरु कृष्ण भुर्तेल, अस्मिन घिमिरे, पार्टी उपसचिव प्रकाश ढुंगाना, युवा फाँट प्रमुख प्रताप डल्लाकोटी, राष्ट्रिय युवा संघ नेपालका केन्द्रीय सदस्य तथा चितवन इन्चार्ज शंकर अधिकारी, अमृता भट्टराई, राष्ट्रिय युवा संघ नेपालका प्रदेश कमिटी नेताहरु, जिल्ला कमिटी नेताहरु, अनेरास्ववियु चितवन अध्यक्ष हरि आचार्य, युवा संघ चितवन तथा अनेरास्ववियुका विभिन्न तह र तप्काका नेता कार्यकर्ताहरु, विभिन्न पालिका कमिटी, कलेज कमिटी, विद्यार्थीहरुसहितको उपस्थिति रहेको थियो ।
