भरतपुर । नेपाल शैक्षिक परामर्श संघ(ई-क्यान) चितवन शाखाको ७ औँ अधिवेशनबाट शुक्रबार दिपकचन्द्र भट्टराईको नेतृत्वमा नयाँ कार्यसमिति चयन भएको छ ।
भरतपुरमा सम्पन्न संघको सातौँ अधिवेशनले भट्टराईको नेतृत्वमा ८ सदस्यीय कार्यसमिति चयन गरेको हो । नयाँ नेतृत्वका लागि भएको मतदानमा अध्यक्षका प्रत्यासी कृष्ण कंडेललाई ४ मतले पछि पार्दै भट्टराई विजयी भएका हुन् । ४८ मत मध्ये भट्टराईले २६ र कंडेलले २२ मत प्राप्त गरेको निर्वाचन समितिले जनाएको छ ।
त्यसैगरी उपाध्यक्षमा प्रज्वल पौडेल विजयी भएका छन् उनले आफ्ना प्रतिष्पर्धी केशवराज सेढाईलाई २ मतले पछि पार्दै विजयी भए । पौडेलले २५ र सेढाईले २३ मत प्राप्त गरे । सचिवमा सुजन थापा क्षेत्री २५ मत ल्याएर विजयी भएका छन् उनका प्रतिष्पर्धी ठाकुर रेग्मीले २३ मत प्राप्त गरे । कोषाध्यक्षमा लक्ष्मण कंडेलले २५ मत ल्याएर विजयी हुँदा सागर श्रेष्ठले २३ मतमै रहे । त्यसैगरी सदस्यहरुमा मेघराज कंडेल, डा. टंकप्रसाद ओझा, उज्वल आचार्य र सन्तोष लोहनी विजयी भएका छन् ।
