– हिरालाल आचार्य ‘डायमण्ड’
चितवन, मंसिर १५ –
प्रधानमन्त्री कप महिला क्रिकेट खेल्न बागमती प्रदेशबाट खेलाडी छनौट प्रतियोगिता सुरु भएको छ ।
चितवनको कृषि तथा वन विज्ञान विश्वविद्यालय रामपुरको जग्गामा निर्माणाधीन गौतमबुद्ध अन्तर्राष्ट्रिय क्रिकेट रंगशालाको नमुना खेल मैदानमा आजबाट उक्त प्रतियोगिता सुरु भएको हो ।
बागमती प्रदेश क्रिकेटका निर्देशक अनिल अधिकारीका अनुसार काठमाडौं, ललितपुर, भक्तपुर र चितवनका महिला खेलाडीहरुबीच प्रतिस्पर्धा हुनेछ । उनीहरुमध्ये उत्कृष्ट खेलाडीहरुको तीन टिम बनाएर तिनीहरुबीच पनि प्रतिस्पर्धा गराई एउटा शसक्त टिम बनाउने गरी बागमती प्रदेश लागेको छ ।
उक्त टिमले बागमती प्रदेशबाट प्रतिनिधित्व गर्दै प्रधानमन्त्री कप महिला क्रिकेट खेल्ने छ ।
आजको प्रतियोगिता भरतपुर महानगपालिका प्रमुख रेनु दाहालले उद्घाटन गरिन् । प्रतियोगितामा बागमती प्रदेश खेलकुद परिषद्का सदस्य सचिव सूर्यलाल भण्डारी, खेलाडी, खेलप्रेमी, स्थानीय जनप्रतिनिधि लगायतको उपस्थिति रहेको थियो ।
लामो समयदेखि अलपत्र बनि काँसघारीमा परिणत भएको चितवनको रामपुरमा निर्माणाधीन गौतमबुद्ध अन्तर्राष्ट्रिय त्रिकेट रंगशालालाई सरकारले राष्ट्रिय गौरवको आयोजनामा राखेर काम अगाडि बढाउने भनेपछि उक्त रंगशालामा चहलपहल हुन थालेको हो । रंगशालाको मुल मैदान सरसफइ हुँदै छ भने नमुना खेल मैदानमा सरसफाइ सकेर खेलकुद प्रतियोगिता नै सुरु गरिएको हो । गत हप्ता भरतपुर महानगरपालिकाले रंगशाला सरसफाइ अभियान सुरु गरेको हो ।
३ अर्ब लागत अनुमान गरी जनस्तरबाट सहयोग उठाएर निर्माण गर्ने गरी धुर्मुस सुन्तली फाउण्डेशनले २०७५ सालमा क्रिकेट रंगशाला निर्माणको थालनी गरेको थियो । ५० करोडभन्दा बढी रकम खर्च भइसकेको, १८ करोड ऋण रहेको र थप सहयोग जुट्न नसकेको भन्दै धुर्मुस सुन्तली फाउण्डेशनले भरतपुर महानगरपालिकालाई रंगशालाको जिम्मेवारी सुम्पेर २०७८ पुषमा कामबाट हात झिक्यो । त्यस यता रंगशाला निर्माणको काम अघि बढ्न सकेको छैन ।
अहिले नेपाल सरकारले उक्त रंगशालालाई राष्ट्रिय गौरवको आयोजनामा राखेर अघि बढाउने निर्णय गरेपछि रंगशाला बन्ने निश्चत जस्तै बनेको छ ।
तर विश्वविद्यालयको जग्गामा रंगशाला बनाउनुहुन्न भन्दै यतिखेर विश्वविद्यालयका कर्मचारी तथा विद्यार्थीहरुले विरोध गर्दै आन्दोलित बनेका छन् । तर सरकारले जग्गा विवादलाई मिलाएर रंगशाला बनाउने बताएको छ ।