१५,कार्तिक, चितवन
चितवनको भरतपुर महानगरपालिका–११ बसेनीमा निर्माणाधीन प्रेस चौतारी चितवनको भवन निर्माणका लागि युवा व्यवसायी प्रशान्त अधिकारीले आर्थिक सहयोग गरेका छन् ।
भवन निर्माणका लागि सेन्ट जेभिर्यस इन्ष्ट्रिच्यूटका प्रवन्ध निर्देशक प्रशान्त अधिकारीले ५ हजार ५ आर्थिक सहयोग गरेका हुन् । युवा व्यवसायी अधिकारीले श्रमजीवी पत्रकारहरूको संगठनले आफ्नो भवन बनाउँदै गर्दा सहयोग गर्न पाउँदा खुसी मिलेको बताउनुभयो ।
उहाँले फरक आस्था र विचार जे भए पनि त्यसभन्दा माथि उठेर सहयोग गरेको भन्दैं पत्रकारहरुको संस्थागत विकास र दक्षतावृद्धिमा भवनले टेवा पुग्ने विश्वास ब्यक्त गर्नुभयो । प्रेस चौतारी चितवनका अध्यक्ष पण्डितले भवनका लागि सहयोग गर्ने अधिकारीलाई धन्यवाद दिँदै सबैको साथ र सहयोगले भवनका लागि हौसला मिलेको बताउनुभयो । समाजसेवी केशव कार्कीले चौतारी चितवनलाई झण्डैं ७० लाख पर्ने १० धुर जग्गा दानमा उपलब्ध गराउनुभएको थियो । सो जग्गामा बन्दै गरेको भवनको लागत १ करोड ५० लाख छ ।
भवनको दोस्रो तला ढलानको काम हुँदैछ । पहिलो तला भित्र फिनिसिङको काम भैरहेको छ । भवनमा आर्थिक सहयोग जुटाउन चौतारी चितवनले गत बर्ष वृहत सांस्कृतिक तथा साहित्यिक कार्यक्रम आयोजना गरेको थियो । भवनका लागि विभिन्न व्यक्ति तथा संघसंस्थाहरुले सहयोग गर्दै आएका छन् । भवनको भूईंतलामा कार्यालय कक्ष रहनेछ ।
पहिलो तलामा कार्यक्रम गर्न मिल्ने हल बन्ने अध्यक्ष पण्डितले जानकारी दिनुभयो ।
