चितवन, कार्तिक १४ –
मंसिर ६ गतेदेखि १६ गतेसम्म १० दिने चितवन नारायणी महोत्सव हुने भएको छ । रिकभरिङ युनाईटेड प्रालिको मुख्य आयोजना तथा औद्योगिक शान्ती नेपाल संस्थाको आयोजनामा चितवन रिकभरि जनचेतना, सांस्कृतिक, पर्यटन, कृषि तथा व्यापार महोत्सव २०८० हुन लागेको हो ।
महोत्सवबारे आज आयोजकले पत्रकार सम्मेलन गरी जानकारी गराएको छ । चितवनको चिनारी तथा मौलिक परम्परा, भेषभुषा र स्थानीय कला तथा संस्कृति संरक्षण गर्दै पर्यटन प्रवर्धन गर्ने एवम् लागु औषध तथा दुव्र्यसनीविरुद्ध जनचेतनामुलक कार्यक्रम गर्नु यस महोत्सवको प्रमुख उद्देश्य रहेको छ । रिकभरिङ युनाईटेड प्रालि लागू औषध तथा मद्यपान प्रयोगकर्ताहरुको उपचार केन्द्र हो । त्यसैले यो महोत्सको मुख्य उद्देश्य भनेकै लागूऔषध तथा मद्यपान प्रयोगकर्ताहरुको निशुल्क उपचार गर्ने भएको आयोजकले जनाएको छ ।
महोत्सवमा प्रवेश शुल्क ७० तोकिएको छ । ज्येष्ठ नागरिक, अपाङ्ग तथा ५ वर्ष मुनिका बालबालिकाहरुलाई निशुल्क प्रवेशको व्यवस्था गरिएको छ ।
पत्रकार सम्मेलनमा संयोजक महेश श्रेष्ठका अनुसार महोत्सवमा राष्ट्रिय तथा स्थानीय कलाकार एवम् जनजाती महासंघकोे प्रस्तुती रहने छ । स्कुल तथा क्याम्पसका विद्यार्थीलाई लागुऔषधविरुद्धको विभिन्न नाटक, कविता, साहित्य, वादविवाद, गीतसंगीत तथा नृत्य प्रतियोगिता गराइने छ ।
महोत्सवका सह संयोजक पिङ्गलराज पन्तले भरतपुर भ्रमण वर्षलाई सफल पार्नका लागि महोत्सवले ठूलो भूमिका खेल्ने बताए । उनले महोत्सव परिसरमा भरतपुर भ्रमण वर्षको प्रचार गरिनुका साथै महोत्सवमा भरतपुर महानगरले गरेका कामहरुका बारेमा डिस्प्लेमा समेत देखाइने बताए ।
महोत्सवमा बाल उद्यान, रोटेपिङ, नाउँ, झुला, ड्रागन, कार तथा मोटरसाइकल रेस र सर्कसहरु मनोरञ्जनको लागि राखिने छ भने औद्योगिक उत्पादनहरु, खाद्यान्नहरु र हस्तकलाका सामानहरुको स्टल राखिने छ । महोत्सवमा दैनिक पाँच हजार नागरिकले अवलोकन गर्ने अपेक्षा राखिएको आयोजकले जारी गरेका प्रेस विज्ञप्तिमा उल्लेख गरिएको छ । आजको पत्रकार सम्मेलन भरतपुर महानगरपालिका १ का वडा सदस्य मनोज घिमिरेले सञ्चालन गरेका थिए भने प्रेस विज्ञप्ति पनि उनैले वाचन गरेर सुनाएका थिए ।
