चितवन, असोज २३ –
भरतपुर ११ स्थिति मालपोत चोकमा रहेको स्टार्स मन्टेश्वरी एकेडमीले बालबालिकालाई किनमेल गर्न सिकाएको छ ।
भरतपुर ११ मुक्तिनगर चोकमा रहेको सपिङ्ग सेन्टर होप दि डिपार्टमेन्टल स्टोर्समा लगेर बालबालिकालाई सपिङ्ग गराइएको हो ।
अभिभावकले दिएको पैसाबाट बालबालिकाले सपिङ्ग गरेका हुन् । पैसाको महत्व बुझाउन तथा पैसा दिएपछि मात्र कुनै सामान पाइन्छ भन्ने ज्ञान दिलाउन बालबालिकालाई किनमेल गराइएको मन्टेश्वरीका सञ्चालक गणेश राना बताउँछन् । बालबालिकाले घरायसी समान किनेका थिए ।
रानाका अनुसार सपिङ्ग मलमा जाँदा के गर्न हुन्छ, के गर्न हुँदैन भन्ने कुरा बालबालिकाले सिक्न पाएका छन् । अभिभावकहरु बालबालिकालाई लिएर सपिङ्ग मल जाँदा बालबालिकाले जथाभावी समान चलाउने, गोजीमा हाल्ने गर्न सक्छन् । त्यो गर्नु हुँदैन भन्ने कुरा बालबालिकालाई राम्रोसँग बुझाइएको रानाको भनाइ छ ।
बाआमालाई नचाहिने समान किनिदिनुस भनेर दुख दिनुहुन्न भन्ने कुरा बालबालिकाले सिक्न पाएका छन् ।
यसका साथै जथाभावी खानेकुरा किन्ने बालबालिकाको बानी हुन्छ । त्यसलाई रोक्न जन्क फुड र हेल्दि फुडको बारेमा पनि बालबालिकालाई बताइएको थियो । आफूलाई आवश्यक परेको समानमात्र किन्नुपर्छ । जन्कफुड खानुहुँदैन भनेर बालबालिकालाई बुझाइएको थियो ।
मन्टेश्वरीको क्षेत्रमा ब्राण्डका रुपमा स्थापित बनेको स्टार्स मन्टेश्वरी धेरै अभिभावकहरुको रोजाइमा पर्न सफल मन्टेश्वरी हो । मन्टेश्वरीले बालबालिकालाई समयसमयमा व्यावहारिक शिक्षा दिनुका साथै कला र मनोरञ्जन सम्बन्धी कुरा पनि सिकाउँदै आइरहेको छ ।
