– हिरालाल आचार्य ‘डायमण्ड’
चितवन, असोज १४ –
भरतपुर २६ स्थित आदर्श मावि दिव्यनगरको शुभ जन्मोत्सव अक्षयकोषमा पूर्व विद्यार्थी मुक्ति दवाडीले पुनः ५० हजार सहयोग गरेका छन् ।
आफ्नो ५४ औं जन्मोत्सवको अवसरमा दवाडीले अक्षयकोषका लागि चौंथो पटक सहयोग गरेका हुन् ।
विद्यालयका प्रधानाध्यापक मित्रबुन्धु चापागाईंका अनुसार अमेरिकामा रहेका दवाडीले उतैबाट ५० हजार रुपैयाँ सहयोग गरेका हुन् । उनले विद्यार्थीलाई चकलेट बाँड्न र केक खुवाउन समेत रकम पठाएका छन् । र आज विद्यालय परिसरमा विद्यार्थीहरुलाई चकलेड बाँड्नुका साथै केक खुवाइएको थियो ।
४ वर्षअघि स्थापना गरिएको अक्षयकोषमा दवाडीले वर्षेनी ५० हजारका दरले सहयोग गर्दै आएका छन् । उनले यो क्रमलाई निरन्तरता दिने समेत बताएका छन् ।
आर्थिक अवस्था कमजोर भएका तथा असाहय विद्यार्थीलाई सहयोग गर्ने उद्देश्यले कोष स्थापना गरिएको बताउँदै प्रधानाध्यापक चापागाईंले यस कोषमा अरुको पनि सहयोग आवश्यक रहेको बताए ।
विगत ४ वर्षदेखि उक्त कोषमा दवाडीले मात्रै सहयोग गर्दै आएका छन् । आर्थिक अवस्था न्यून भएका विद्यार्थीहरुको बाहुल्यता रहेको उक्त विद्यालयमा अब अन्य पूर्व विद्यार्थी र समाजसेवीले पनि यसतर्फ चासो दिनुपर्ने आवश्यकता देखिन्छ ।