– हिरालाल आचार्य ‘डायमण्ड’
चितवन, असोज ११ –
कक्षा १२ को ग्रेड वृद्दि परीक्षामा भरतपुर माविले लापरबाही गरेको पाइएको छ ।
भरतपुर १० मा रहेको उक्त विद्यालयले कक्षा १२ को ग्रेड वृद्दि परीक्षामा विद्यार्थीलाई अर्कै विषयको परीक्षा दिन लगाएर लापरबाही गरेको हो । परीक्षामा पहिलो दिन अंग्रेजी र दोश्रो दिन नेपालीको परीक्षा दिन लगाउनु पर्नेमा विद्यालयले उल्टो गरेको हो ।
विद्यार्थीको आग्रहलाई समेत वेवास्ता गरी विद्यार्थीलाई नै भ्रममा पारेर विद्यालयले पहिलो दिन नेपाली विषयको परिक्षा दिन लगाएर अर्को विषयको परिक्षा दिनबाट वञ्चित गराएको छ ।
यस विषयमा विद्यालयका प्राधानाध्यापक खेम नारायण पौडेलले विद्यालयको गल्ति स्वीकार गर्दै शिक्षकहरु झुक्किँदा यस्तो समस्या आएको बताए । उनले चितवन आजसँग कुरा गर्दै भने, ‘सानो कोड र ठूलो कोडमा झुक्किनुभो साथीहरु । सानो कोड अघिल्लो दिन दिने ठूलो कोड चाहिँ पछिल्लो दिन दिने भन्ने कुरा थियो । तर अंग्रेजी र नेपालीमात्र लागेको छ भने अंग्रेजी पहिलो दिन दिने र नेपाली दोश्रो दिन दिने भनेको रहेछ । त्यसमा साथीहरु झुक्किनु भो ।’
विद्यार्थीले अब अर्काे वर्ष ग्रेड वृद्दिको परीक्षा दिनुपर्ने उनले बताए । त्यस्तो खालको समस्या एक जना विद्यार्थीको परीक्षामा आएको बताउँदै उनले अभिभावक र विद्यालय व्यवस्थापन समितिसँग बसेर अभिभावकसँग क्षमा याचना गरिएको उनको भनाइ छ । अभिभावक र विद्यार्थीलाई सहमतिमा ल्याइएको उनले बताए ।
000
अनेरास्ववियुको आपत्ती
यसैगरी उक्त विषयमा अखिल नेपाल राष्ट्रिय स्वतन्त्र विद्यार्थी युनयिन (अनेरास्ववियु) चितवनले गम्भीर आपत्ती जनाएको छ । अनेरास्ववियु जिल्ला कमिटी उपाध्यक्ष सरोज तिमिल्सना र सचिव अमित आचार्यको नेतृत्वमा गएको टोलीले आज विद्यालय व्यवस्थापन समितिलाई ज्ञापन पत्र बुझाउँदै उक्त विषयमा छानबिन गरी दोषीलाई कारबाही गर्न माग गरेको हो ।
विद्यार्थीहरुको भविष्यमाथि गरिएको गैरजिम्मेवारी पूर्ण कार्यप्रति अनेरास्ववियुले खेद प्रकट गर्दै पीडित विद्यार्थीलाई न्याय दिलाउन सम्बन्धित सरोकारवालाहरु सँग माग गरेको छ ।
