चितवन, बैशाख २२ –
सत्तारुढ गठबन्धनले आज भरतपुरको गर्न लागेको आमसभा स्थल रातभरको पानीले डुबानमा परेको छ । भरतपुरको केन्द्रीय बस टर्मिनल क्षेत्रमा आम सभा गर्ने गरी तयारी गरिएको थियो ।
पानीले डुबानमा परेको उक्त स्थलमा सेफ्टी टं्याकरले पानी तानेर अन्यत्र फालिएको छ भने माटो भरेर डोजरले सम्मयाइएको छ ।
नेपाली कांग्रेस चितवन जिल्ला कार्यसमितिका उपसभापति एवम् पाँच दलीय गठबन्धन चुनाव प्रचार प्रसार समिति चितवनका संयोजक राजिभ न्यौपानेले समयमा नै आम सभा सुरु गर्ने गरी व्यवस्थापन गरिएको बताए । पानी सुकाएर माटो भरिएको बताउँदै उनले सबैलाई आमसभामा आउन आह्वान गरेका छन् ।
चुनावी सभा भने मध्यान्ह १२ बजे हाकिम चोक नजिकै रहेको केन्द्रीय बस टर्मिनल क्षेत्रमा हुने भएको छ । कांग्रेसको केन्द्रीय निर्वाचन परिचालन समितिले तय गरेको चुनावी सभा भए पनि गठबन्धनको संयुक्त चुनावी सभाको रूपमा परिणत गरिएको हो ।
गठबन्धन दलका शिर्षस्त नेताहरूले आज चुनावी सभालाई सम्बोधन गर्दै छन् । सभालाई सम्बोधन गर्न प्रधानमन्त्री एवम् कांग्रेस सभापति शेरबहादुर देउवा बुधबारै चितवन आएका छन् ।
गठबन्धनका अन्य दलहरू नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल, कांग्रेस वरिष्ठ नेता रामचन्द्र पौडेल, महामन्त्री गगन थापालगायत नेताले सभालाई सम्बोधन गर्ने कार्यक्रम रहेको छ ।
गठबन्धनको तर्फबाट पूर्वमहानगर प्रमुखसमेत रहेकी रेणु दाहाल प्रमुख पदकी उम्मेदवार छिन् । उनी माओावादी अध्यक्ष प्रचण्डकी छोरीसमेत हुन् ।
उनीविरुद्ध गठबन्धन दल कांग्रेसबाट पूर्वराष्ट्रिय सभा सदस्य जगन्नाथ पौडेल बागी उम्मेदवार बनेका छन् । पौडेल बागी उम्मेदवार बन्दा दाहाललाई निर्वाचन जित्न चुनौती थपिएको छ । जसले गर्दा गठबन्धनका शिर्षस्थ नेताहरु सबै भरतपुर ओहिरिएका छन् ।
