बुटवल, साउन १६
लुम्बिनी प्रदेशमा लम्पी स्किन रोगबाट ५ हजार बढी पशु चौपाया मरेका छन् । लुम्बिनी प्रदेशको पशुपंक्षी निर्देशनालयका अनुसार हालसम्म प्रदेशमा ५ हजार ६४६ पशुको लम्पी स्किनको संक्रमणबाट मृत्यु भएको छ ।
लुम्बिनी प्रदेशमा पहिलोपटक २ साउन २०७७ मा लम्पी स्किन रोगको संक्रमण देखिएको थियो । हालसम्म १ लाख ८१ हजार ९३५ पशु यो रोगबाट संक्रमित बनेका छन् ।
निर्देशनालयका निर्देशक डा. परबेज आलमले लुम्बिनी प्रदेशमा लम्पी स्किन रोगका कारण १२ करोड ५० लाख बराबरको क्षति भएको बताए । लम्पी स्किन रोग लागेका पशुबाट ५० प्रतिशतसम्म दुध उत्पादनमा कमी हुने भन्दै उनले अहिले प्रदेशमा दैनिक १ करोड ५० लाखको आर्थिक क्षति भइरहेको बताए ।
हाल प्रदेशमा प्रदेश स्तरीय लम्पीरोग नियन्त्रण कार्यदल गठन गरेर रोगको नियन्त्रणको पहल भइरहेको छ । प्रदेशमा अहिले ३० लाख बढीको औषधि तथा खोप खरिद गरी परिचालन गरिएको निर्देशनालयले जनाएको छ ।
हालसम्म ३८ हजार ७९३ खोप तथा १ लाख २ हजार ४७६ पशुको उपचार गरिएको र त्यसका लागि ६३८ जनशक्ति परिचालन गरिएको बताइएको छ । स्थानीय तहबाट पनि लम्पी स्किन रोगको खोप लगाउने कार्य भइरहेको छ । यो रोगबाट प्रदेशमा २३ हजार ९२७ पशु निको भएको छन् ।
अहिले प्रदेश सरकारले आकस्मिक कोषको बजेटले खोप खरिद गरेर जिल्ला–जिल्लामा पठाइएको छ । निर्देशनालयका अनुसार आकस्मिक खोपका लागि ३९ लाख, खोप खरिदका लागि ५३ लाख, लजिष्टिकका लागि ३५ लाख १ करोड २७ लाख र थप नियन्त्रणका लागि २ करोड ८३ लाख बराबरको कार्ययोजना बनाई बजेट माग गरेको निर्देशनालयका निर्देशक आलमले बताए ।
