चितवन, असार २१ –
एमाले निकट विद्यार्थी संगठन अनेरास्ववियु वीरेन्द्र बहुमुखी क्याम्पस कमिटीले राष्ट्रपतिको सहयोगार्थ रु १ संकलन अभियान आज क्याम्पसमा सम्पन्न गरेको छ ।
आफ्नो उपचार आफै गर्ने बताएका राष्ट्रपति रामचन्द्र पौडेलले सरकारसँग ५५ लाख उपचार खर्च मागेका र सरकारले दिने प्रक्रिया थालिसकेको अवस्थामा राज्यको ढुकुटी बचाउनका साथै राष्ट्रपतिको उपचार खर्च जुटाउन अनेरास्ववियु वीरेन्द्र बहुमुखी क्याम्पस कमिटीले रू १ सहयोग अभियान आज क्याम्पसमा सम्पन्न गरेको क्याम्पस कमिटीका अध्यक्ष सुदिप पौडेलले चितवन आजलाई जानकारी दिए ।
राष्ट्रपति रामचन्द्र पौडेललाई उपचारका लागि दिल्ली लैजाँदा भएको एयर एम्बुलेन्स र फर्किँदाको नेपाल वायु सेवा निगमको भाडासहित ५५ लाख रुपैयाँ भुक्तानीका लागि अर्थ मन्त्रालयलाई परराष्ट्रले पत्राचार गरेपछि अनेरास्ववियुले सहयोग संकलन अभियान सुरु गर्ने निर्णय गरेको छ ।
सो निर्णय अनुसार चितवनका विभिन्न क्याम्पस कमिटीले सहयोग रकम उठाउन सुरु गरेका छन् ।
राष्ट्रपति पौडेलाई २०८० वैशाख ६ गते श्री एयरलाइन्सको चार्टर एयर एम्बुलेन्सबाट भारत लगिएको थियो । भारतबाट वैशाख १७ मा फर्किदा राष्ट्रपतिसहितको टोली नेपाल वायु सेवा निगमको नियमित उडानबाट आएको थियो । चार्टर विमान र नियमित उडानका भाडाबापत ५५ लाख २ हजार २७९ रुपैयाँ भुक्तानीका लागि परराष्ट्रले सोमबार अर्थलाई पत्राचार गरेको छ ।