समझादारीपछि पहिलो चरणमा १०० जना मात्रै नर्स पठाउन लागिएको मन्त्रालयले जनाएको छ । समझदारीअनुसार स्वास्थ्यकर्मीको छनोट र पदस्थापन नेपालको वैदेशिक रोजगार विभाग तथा बेलायतको डिपार्टमेन्ट अफ हेल्थ एन्ड सोसियल केयर वा तोकिएको निकायको प्रत्यक्ष संलग्नतामा सरकारी प्रक्रियाबमोजिम हुनेछ ।

समझादारीपत्रमा नेपाली स्वास्थ्यकर्मीलाई बेलायतको स्वास्थ्य सेवामा सुरक्षित, मर्यादित र व्यवस्थित तरिकाले रोजगारीमा संलग्न हुने व्यवस्था मिलाइने उल्लेख छ । विश्व स्वास्थ्य संगठनको ‘हेल्थ वर्कर सपोर्ट एन्ड सेफगार्ड लिस्ट २०००’ मा नेपाल समावेश रहेको अवस्थालाई मध्यनजर गरी स्वास्थ्यकर्मीको संख्या र प्रकारका सम्बन्धमा दुवै सरकारले संयुक्त निर्णय गर्ने उल्लेख छ ।

त्यस्तै, नेपालको स्वास्थ्य क्षेत्रको विकास र सुदृढीकरणमा बेलायत सरकारको योगदान रहँदै आएकोमा आगामी दिनमा समेत स्वास्थ्य क्षेत्रको निरन्तर सुदृढीकरण र आधुनिकीकरणमा सहयोग जारी हुने सम्झौतामा उल्लेख छ ।

परीक्षणको रुपमा प्रथम चरणमा नेपाली नर्सहरुलाई बेलायतमा पदस्थापना गर्ने कार्य इम्प्लिमेन्टेसन प्रोटोकलअनुसार हुने पनि समझदारी भएको छ । त्यस्तै, नियुक्ति प्रक्रियाका लागि कुनै शुल्क नलाग्ने एवं रोजगारीका लागि छनोट भएका स्वास्थ्यकर्मीको लागतको शोधभर्ना हुने पनि समझादारी भएको छ ।

के कस्ता सुविधा पाउँछन् ?

सरकारले पहिलो चरणमा १०० जना नर्स पठाउने तयारी गरेको छ । बेलायतको नेसनल हेल्थ सर्भिसअन्तर्गत हेल्थ केयर असिस्टेन्टको रुपमा उनीहरुले काम गर्नेछन् । उनीहरुको पारिश्रमिक वार्षिक २६ हजार २८२ पाउन्ड हुने सम्झौतामा उल्लेख छ ।

बेलायत पठाइने नर्सहरु पाँच वर्षसम्म त्यहाँ सेवा गरी फर्किनुपर्ने व्यवस्था गरिएको छ । आगामी दिनमा अन्य स्वास्थ्य जनशक्तिलाई पनि पठाउन सकिने गरी सम्झौता भएको मन्त्रालयले जनाएको छ ।