चितवन, जेठ २६ –
नेपाल डेमोक्र्याटिक लयर्स एशोसियशन (डीएलए) को ११ औं महाधिवेशनमा चितवनको टाँडीमा सुरु भएको छ । पाँच वर्षपछि डीएलएको महाधिवेशन हुन लागेको हो ।
आजबाट सुरु भएको महाधिवेशन भोलिसम्म गर्ने समय तालिका छ । कांग्रेस शुभेच्छुक संस्था डीएलएको महाधिवेशनको उद्घाटन आज पूर्व प्रधानमन्त्री तथा नेपाली काँग्रेसका सभापति शेरबहादुर देउवाले गरे ।
महाधिवेशनको उद्घाटन गर्दै देउवाले सकभर मेलमिलाप गरेर नभए स्वस्थ प्रतिस्पर्धा गरेर नेतृत्व चयन गर्न आग्रह गरे ।
महाधिवेशनको उद्घाटन सत्रमा देउवासहित काँग्रेसका शिर्षस्थ नेताहरुको उपस्थिति रहेको थियो । वरिष्ठ नेता शेखर कोइराला, पार्टी उपसभापति तथा कानुनमन्त्री धनराज गुरुङ्ग, महामन्त्री गगन थापा, कांग्रेस सचेतक तथा वरिष्ठ अधिवक्ता रमेश लेखक लगायतको उपस्थिति रहेको थियो ।
महाधिवेशनमा बोल्दै केही अधिवक्ताहरुले डीएलएलाई पार्टीले कुनै पनि हस्तक्षेप नगरी स्वतन्त्र छाड्नुपर्ने धारणा राखेका थिए । उक्त कुरा डीएलएको यस महाधिवेशनले निर्णय गरेमा आफूहरु मान्न तयार रहेको वरिष्ठ नेता शेखर कोइराला र महामन्त्री गगन थापाले बताए ।
दुईदिनसम्म चल्ने महाधिवेशनमा सहमति नभए आज रातिसम्ममा मनोनयन दर्ता गरी सक्ने र भोलि निर्वाचन गराउने तयारी गरिएको छ ।
