काठमाडौं बैशाख १०
राष्ट्रिय स्वतन्त्र पार्टी (रास्वपा)का सभापति एवं चितवन क्षेत्र नम्बर–२ का उमेदवार रवि लामिछानेले अरू पार्टीका उमेदवारलाई संयमित हुन आग्रह गरेका छन् ।
चितवन–२ अन्तर्गत भरतपुर महानगरपालिका–११ स्थित नयाँकिरण मावि मतदान केन्द्रमा आइतबार लामिछाने पुग्दा समर्थकले नाराबाजी गरेका थिए । त्यसपछि अरू पार्टीका कार्यकर्ताले आपत्ति जनाए । त्यहाँ धकेलाधकेल समेत भएको थियो ।
त्यसपछि आफ्नो निवास फर्किएर लामिछानेले फेसबुक लाइभ गरे । लाइभका क्रममा उनले आफ्ना समर्थकमाथि योजनाबद्ध हमला गरिएको जिकिर गरे
“हामी पुग्दा केही नाराबाजी र ग्रीट गर्ने काम भएको हो । यस्तो पहिले पनि भएको थियो, तर त्यस बेला प्रतिस्पर्धी उमेदवारहरूले यसलाई सामान्य रूपमा लिएर शान्तिपूर्ण मतदान भएको थियो,” उनले भने, “तर, तपाईंले पूर्वतयारी गरेर हाम्रा साथीहरूमाथि हुलहुज्जत भएको छ । यस्ता योजनाको जानकारी पाएर हामीले प्रशासनलाई जानकारी पनि गराएका थियौँ । म फेरि पनि तमाम मतदाता महानुभावहरूलाई भन्न चाहन्छु– संयमित भएर मतदानमा जानुस् ।”
उनले प्रधानमन्त्री पुष्पकमल दाहाल ‘प्रचण्ड’सहित सरोकारवाला सबैको ध्यानाकर्षण गराइसकेको बताए । अरू पार्टीका उमेदवारलाई पनि संयमता अपनाउन आग्रह गरे ।
लोकतन्त्रको सुन्दरताको कुरा गर्नेहरूले नै निर्वाचन जित्न जस्तोसुकै हर्कत गर्न थालेको उनले आरोप लगाए । उनले गलत काम नगर्न चेतावनी समेत दिए ।
“तपाईंहरू लोकतन्त्रको सुन्दरताको कुरा गर्दै हुनुुहुन्छ । यसो भन्दै लोकतन्त्रको सुन्दर पक्षलाई नजरअन्दाज गर्नुभयो र हुलहुज्जत, गुन्डागर्दी, डर, त्रास र धम्कीको सहारा लिनुभयो भने इतिहासले यसको मूल्यांकन गर्नेछ,” उनले भने, “हामी भर्खरै आएको पार्टी हौँ । हामीसँग मतदाताको समर्थनबाहेक अरू केही पनि छैन । उनीहरूले समर्थन र ग्रीट गर्ने कुरालाई योजनाबद्ध हमला नगर्नुहोला ।”
उनले आफ्ना समर्थकलाई पनि संयमित बन्न र जथाभावी कमेन्ट नगर्न अनुरोध गरे ।
