चितवन, बैशाख ९ –
एक्कासी आएको वर्षासहितको हावाहुरीले चितवनमा वितण्डै मच्चाएको छ । हावाहुरीका कारण विभिन्न स्थानमा पोल भाँचिएका छन् भने, रुख ढलेर अटो च्यापिएको छ यस्तै भरतपुर एफएमको टावर ढलेर प्रसारण नै अवरुद्ध भएको छ ।
हावाहुरीले भरतपुर एफएमको टावर भाँचिनुका साथै सोलार प्यानल समेत उडाएको छ । भरतपुर–४ यज्ञपुरीमा रहेको टावर भाँचिदा रेडियोको प्रसारण नै अवरुद्ध भएको छ । एफएमका अध्यक्ष नविन पौडेलले १५ लाख जतिको क्षति भएको अनुमान गरिएको चितवन आजलाई बताए ।
उनले टावरमा भएका उपकरणहरुमा क्षति नभएको भए करिब एक हप्तामा प्रसारण सुरु गर्न सकिने बताए । यदि ती उपकरण नष्ट भएको भए एक डेढ महिनासम्मै प्रसारण अवरुद्ध हुन सक्ने बताए ।
विद्युत प्राधिकरण भरतपुर वितरण केन्द्रका प्रमुख राजिव सिंहले विभिन्न स्थानमा पोल भाँचिएको खबर आएको बताए । उनले देवनगर, गितानगर र बाह्रघरे तिर पोल भाँचिएको खबर आएको चितवन आजलाई बताए । जसका कारण अधिकांश स्थानमा विद्युत अवरुद्ध भएको छ । छिट्टै मर्मत गरी विद्युत वितरण गरिने प्रमुख सिंहले जानकारी दिए ।
जिल्ला प्रहरी कार्यालय चितवनका सूचना अधिकारी एवम् प्रहरी नायव उपरीक्षक (डिएसपी) नरहरी अधिकारीका अनुसार रुख ढल्दा अटोमा सामान्य क्षति भएको छ । क्यान्सर अस्पताल रोडमा पार्किङ्गमा राखिएको अटो भएकाले मानवीय क्षति भने भएको छैन ।
