– हिरालाल आचार्य ‘डायमण्ड’
चितवन, फागुन ३० –
वीरेन्द्र क्याम्पससहित चितवनका १० वटा क्याम्पसमा विद्यार्थी संगठनले लगाएको ताला प्रहरी प्रशासन लगाएर फुटालिएको छ ।
त्रिभुवन विश्वविद्यालय अन्तर्गतका क्याम्पसहरुमा चैत्र ५ गते स्ववियु चुनाव हुँदैछ । उपत्यकासहित देशका सबैजसो जिल्लामा चुनावको माहोल बनिरहँदा चितवनका आधा जसो क्याम्पसमा भने तालाबन्दी थियो ।
त्रिविको आंगिक क्याम्पस र विद्यार्थी संख्या पनि सबैभन्दा धेरै रहेको क्याम्पस वीरेन्द्रमा पनि तालाबन्दी थियो । केही विद्यार्थी संगठनले पुरा गर्नै नसकिने मागहरु राखेर चितवनका क्याम्पस क्याम्पसमा पुगि तालाबन्दी गरेपछि चितवनका प्रमुख राजनैतिक दलहरुको ध्यान केन्द्रित गर्यो ।
त्यसपछि हिजो जिल्ला प्रशासन कार्यालय चितवनमा बसेको क्रियाशिल राजनैतिक दलहरुको बैठकले चितवनका क्याम्पसमा लागेका तालाबन्दी खोल्न विद्यार्थी संगठनलाई १२ घण्टे अल्टिमेटम दिने र अटेर गरे प्रहरीले ताला फुटाउने निणर्य गर्यो ।
त्यसपछि उमाबडी आदर्श शेरचन कलेजमा अनेरास्ववियुले लगाएको ताला आफै खोलिदियो । उमाबडीमा विद्यार्थी जथाभावी भर्ना गरिएको भन्दै अनेरास्ववियुले तालाबन्दी गरेको थियो । अन्य १० क्याम्पसमा नेपाल समाजवादी विद्यार्थी यूनियन, लोकतान्त्रिक विद्यार्थी संघ लगायतका विद्यार्थी संगठनले स्ववियु निर्वाचन पूर्ण समानुपातिक हुनुपर्ने माग राख्दै तालाबन्दी गरेका थिए ।
पूर्ण समानुपातिकको माग राख्नु भनेको निर्वाचन प्रणाली माथि नै प्रश्न उठाउनु र निर्वाचन विरोधी गतिविधि गर्नु भएको ठहर गर्दै प्रमुख राजनैतिक दल र प्रशासनले ताला फुटाउने निर्णय गरेका हुन् ।
उक्त निणर्य अनुसार आज १० वटा क्याम्पसमा प्रहरीले तालाबन्दी फुटालेर चुनावी प्रक्रिया अगाडि बढाउन क्याम्पस प्रशासनलाई साथ दिएको छ ।
जिल्ला प्रहरी कार्यालय चितवनका प्रमुख एवम् प्रहरी उपरीक्षक (एसपी) रामेश्वर कार्कीले प्रशासनको आदेश अनुसार आफूहरुले काम गर्ने बताए । उनले क्याम्पसमा प्रहरी खटाएर चुनाव सम्पन्न गराउने बताए । यदि कसैले फेरि तालाबन्दी गर्न खोजे तत्काल पक्राउ गरी नियन्त्रणमा लिइने उनको चेतावनी छ ।
हिजो जिल्ला प्रशासन कार्यालय चितवनको जारी सूचनामा भनिएको छ- ‘स्ववियु निर्वाचनको सन्दर्भमा क्याम्पसहरुमा लागेको तालाबन्दी हटाउन सम्बन्धिन राजनीतिक दलहरुले आ-आफ्ना विद्यार्थी संगठनहरुलाई निर्देशन गर्ने तथा सोही बमोजिम गर्न अन्य सरोकारवालाहरुलाई आग्रह गर्ने, जिल्ला प्रशासन कार्यालयबाट फागुन ३० गते विहान ६ बजेभित्र क्याम्पसहरुमा लागेको तालाबन्दी हटाउन अनुरोध गर्दै सार्वजनिक सूचना जारी गर्ने र सो अवधिसम्म तालाबन्दी नहटाएमा सुरक्षाको निकायको तर्फबाट तालाबन्दी हटाई निर्वाचन प्रक्रियालाई अघि बढाइने ।’
यस्तै चितवन प्रशासनले सम्पूर्ण क्याम्पस व्यवस्थापनहरुलाई तोकिएकै मिति चैत ५ गते नै स्ववियु निर्वाचन गर्न सो अघिका विभिन्न क्रियाकलाप र गतिविधिहरुको संक्षिप्त प्रक्रिया अवलम्बन गरी सम्पन्न गर्न अनुरोध गर्ने निणर्य भएको सूचनामा उल्लेख छ ।
प्रशासनको सूचना :
