काठमाडाैं | फागुन १२,
राष्ट्रिय क्रिकेट टीमका सदस्य सन्दीप लामिछानेले यूएई जान पाऊँ भन्दै दिएको निवेदनमाथि आज सर्वोच्च अदालतमा सुनुवाइका लागि पेशी तोकिएको छ ।
सर्वोच्च अदालतका न्यायाधीश ईश्वरप्रसाद खतिवडाको एकल इजलासमा पेशी तोकिएको हो । आईसीसी क्रिकेट वर्ल्डकप लीग टुअन्तर्गत यूएई र पीएनजीविरुद्धको सिरिजका लागि यूएई जान अनुमति माग्दै लामिछाने सर्वोच्च अदालत पुगेका हुन् ।
उच्च अदालतले विदेश जान रोक लगाएका कारण सन्दीप यूएई जाने टीममा परेका छैनन् । सोही प्रतिबन्ध फुकुवाका लागि सन्दीपले बिहीवार सर्वोच्चमा निवेदन दिएका हुन् ।
सन्दीपलाई धरौटीमा छाड्ने आदेश दिँदा उच्च अदालत पाटनले विदेश जान नपाउने गरी प्रतिबन्ध लगाएको थियो ।
नेपाल-यूएई र पीएनजीबीच आगामी साता यूएईमा सिरिज हुँदैछ । एक दिवसीय वरीयता जोगाउनका लागि पनि उक्त सिरिज नेपालका लागि निकै महत्त्वपूर्ण छ ।
त्यसबाहेक सरकारले गरेको पुनरावेदनको नियमित पेसी न्यायाधीशद्वय प्रकाश कुमार ढुंगाना र हरिप्रसाद फुयाँलको संयुक्त इजलासमा आज नै तोकिएको छ ।
