सनराइज स्कुलका सहायक प्रिन्सिपल भूमिराज तिवारीले एसइई २०७८ को नतिजाले विद्यालयलाई थप जिम्मेवारी बोध भएको बताए । ‘आगामी दिनमा जिल्लाभन्दा पनि माथि उठेर नतिजा दिनुपर्नेछ । प्रदेशस्तरमा होस् वा राष्ट्रियरुपमै नतिजा ल्याउनुपर्ने थप चुनौती हामीलाई सिर्जना भएको छ । त्यो पूरा गर्नका लागि मेहनती शिक्षकशिक्षिकाहरु र कर्मठ विद्यार्थी भाइबहिनीहरु एकदमै तत्परताका साथ लागिराख्नुभएको छ’, उनले भने ।

परीक्षाकेन्द्रित भएर परीक्षाको दिनमा मात्रै गरेको अध्ययनले पक्कै पनि राम्रो नतिजा नआउने उनी बताउँछन् । ‘आधारभूत कुरादेखि लिएर विद्यार्थी भाइबहिनीहरुलाई तयारी गर्दै लैजाने, परीक्षालाई कसरी फेस गर्ने, चुनौतीको सामना गर्ने भनेर क्रमशः सिकाउँदै लैजाँदाखेरि राम्रो नतिजा दिएको पाएका छौँ’, उनले भने ।

लिटिल फ्लावर स्कुलका प्रिन्सिपल फादर रोवीले कमजोर विद्यार्थीलाई पनि प्राथमिकता दिएर पढाउँदा औसत नतिजा राम्रो आएको बताए । आगामी परीक्षामा जिल्ला पहिलो बन्ने गरी मेहनत गरिएको उनले बताए । ‘हामीले कुनै एउटा विद्यार्थीलाई मात्रै प्राथमिकता दिदैनौँ, सबैलाई हेर्छौं । कमजोर विद्यार्थीलाई छुट्टै कक्षा लिएर भए पनि अगाडि बढाउछौँ’, उनले भने ।