काठमाडौं , माघ २७
सत्ता गठबन्धनको उच्चस्तरीय राजनीतिक संयन्त्रको बैठकमा विभिन्न विषयमा छलफल भएको छ । आज बिहान प्रधानमन्त्रीको सरकारी निवास बालुवाटारमा संयन्त्रको बैठक बसेको थियो ।
बैठकमा पछिल्लो राजनीतक घटनाक्रम, आसन्न राष्ट्रपति पदको निर्वाचनलगात विषयमा छलफल भएको बताइएको छ । राष्ट्रिय स्वतन्त्र पार्टी (रास्वपा)लाई पुनः सरकारमा सहभागी हुन आग्रह पनि गरिएको थियो ।
बैठकमा सहभागी उपप्रधान एवं ऊर्जा, जलस्रोत तथा सिँचाइमन्त्री समेत रहेका राष्ट्रिय प्रजातन्त्र पार्टी (राप्रपा)का अध्यक्ष राजेन्द्रले लिङदेनले नियमित बैठक भएको प्रतिक्रिया दिए । सरकार बनेयताको परिस्थितिको समीक्षा गरिएको उनले बताए ।
“गठबन्धनमा सात दल आबद्ध छन् । तर, बैठकमा चार दलका नेता मात्र सहभागी भएका थए ।
गठबन्धनमै रहेका जनता समाजवादी पार्टी (जसपा), नागरिक उन्मुक्ति पार्टी र जनमत पार्टीका कोही पनि नेता बैठकमा सहभागी भएनन् । स्रोतका अनुसार जसपाका अध्यक्ष उपेन्द्र यादव अहिले जनकपुरमा छन् । नागरिक उन्मुक्तिका अध्यक्ष रञ्जीता श्रेष्ठ चौधरी बिहान डिल्लीबजार कारागार पुगेकी थिइन् । त्यहाँ उनले आफ्ना पति समेत रहेका नेता रेशम चौधरीसित भेटवार्ता गरेको स्रोतले जनाएको छ ।
यस्तै, जनमतका अध्यक्ष सीके राउत अहिले काठमाडौं उपत्यकाभन्दा बाहिर रहेका सो पार्टीका एक नेताले जानकारी दिए ।
बैठकमा संयन्त्रका संयोजक समेत रहेका नेकपा (एमाले)का अध्यक्ष केपी शर्मा ओली, प्रधानमन्त्री समेत रहेका नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’, रास्वपाका सभापति रवि लामिछाने र राप्रपाका अध्यक्ष लिङदेन मात्र सहभागी भएका थिए ।
प्रचण्डलाई प्रधानमन्त्री बनाउन सहयोग गरेका तीन दलका नेता बैठकमा सहभागी नभएका हुन् । पछिल्लो समयमा सत्ता गठबन्धनमा असन्तुष्टि देखिएको छ ।
