भरतपुर । भरतपुर ५, कल्याणपुरमा रहेको श्री राम मन्दिरको महायज्ञमा भक्तजनहरुको सहभागीता संगै आर्थिक सहयोग बढ्दै गएको छ । सत्तलसहितको भौतिक पूर्वाधार निर्माणका लागि २३ गते देखि शुरु भएको श्रीमद्भागवत् सप्ताह ज्ञान महायज्ञ २०७९ मा सहयोगीको संख्या बढेको हो ।
समितिले घरदैलो अभियान समेत शुरु गरेको मन्दिर व्यवस्थापन समितिका कोषाध्यक्ष नारायण आचार्यले बताए । महायज्ञको जानकारी संगै स्थानियहरुलाई आर्थिक संकलनको उद्देश्य बारे जानकारी गराउन विहान ७ बजे देखि ११ बजे सम्म घरदैलो अभियान गरेका हौँ “आचार्यले भने “।
घरदैलो अभियानसंगै सहयोग रकम र भक्तजनहरुको सहभागिता बढ्न सुरु भएको उनले बताए । तेस्रो दिन सम्म आईपुग्दा महायज्ञ बोल चन्दा २ लाख १२ हजार र नगद चन्दा १ लाख १२ हजार गरेर ३ लाख २४ हजार रुपैँया संकलन भएको छ ।
मन्दिरमा निर्माणाधीन क्रममा रहेको सत्तललाई पूर्णता दिन र थप भौतिक पूर्वाधार विकासका लागि महायज्ञ लगाइएको श्रीराम मन्दिर समितिका अध्यक्ष एवम् महायज्ञ मूल समारोह समितिका संयोजक यमप्रसाद आचार्य बताउँछन् । उनका अनुसार ५० लाख रुपैयाँ महायज्ञबाट संकलन गर्ने लक्ष्य छ । झण्डै एक दशक अघि १ करोड लागत अनुमान गरेर तीनतले भवन निर्माण शुरु भए पनि आर्थिक अभावका कारण सत्तलको भुईंतला समेत निमार्ण हुन सकेको छैन । अध्यक्ष आचार्यले भने, ‘यस पटक महायज्ञबाट हामीले भुईंतलालाई पुर्णता दिने लक्ष्यमा छौँ ।’
२०२३ सालमा स्थापना भएको यस मन्दिरका लागि स्थानिय धर्मप्रेमी स्व। हवल्दार सन्तमान श्रेष्ठबाट ३ कठ्ठा र स्व. तेजमान श्रेष्ठबाट १ कठ्ठा जग्गा दानगरी दैनिक पूजापाठ आरम्भ भएको थियो । देउसी भैलो र विभिन्न दाताको सहयोगमा मन्दिरक बनेका संरचनामा धार्मिक कार्यहरु सञ्चालन हुँदै आएको थियो । महायज्ञबाट संकलित रकमले धर्मशाला निर्माण गरि मन्दिरलाई धामको रुपमा विकास गर्ने समितिको योजना छ । महायज्ञ अवधिभर नगदसँगै तुलादान, भूमिदान समेत गर्न सकिने छ ।
अनाथ आमा आश्रम नेपालका संरक्षक अठार पुराणका कथावाचक नारायण कृष्णचरणामृत न्यौपानेले श्रीमद्भागवत् सप्ताह ज्ञान महायज्ञमा कथा वाचन गर्नु भएको छ ।
श्री राम मन्दिरु समिति, आनन्द कल्यााण आमा समुह र राम मन्दिर टोल विकास संस्थाको संयुक्त आयोजनामा शुरु भएको श्रीमद्भागवत् सप्ताह ज्ञान महायज्ञ २९ गते सम्म संचालन हुने छ ।
