त्यसैमा राष्ट्रिय स्वतन्त्र पार्टीलाई गृहमन्त्री दिने नदिने विषयमा मतभेद सुरु भएको छ । नागरिकता विवादमा रास्वपाका सभापति रवि लामिछानेको गृहमन्त्रीको पद गुमेसँगै गृह मन्त्रालयको जिम्मेवारी प्रधानमन्त्री प्रचण्डले सम्हालेको अवस्था छ । लामिछानेले आइतबार नागरिकता पुनः प्राप्ति गरेपछि लामिछानेले आफूलाई गृह मन्त्रालयको जिम्मेवारी दिन दौडधुप थालिसकेका छन् । आइतबार नेपाली नागरिकता कायम भएपछि लामिछाने पुन गुमेको पद फर्काउन प्रधानमन्त्री प्रचण्डलाई भेट्न बालुवाटार पुगेका थिए ।

भेटमा उनले पहिलाको सहमति अनुसार नै उपप्रधान तथा गृह मन्त्रालयको जिम्मेवारी दिन प्रचण्डसँग आग्रह गरेका थिए । सांसद नभए पनि ६ महिनासम्म गैरसांसद मन्त्री बन्न पाउने व्यवस्थाअनुसार आफूलाई जिम्मेवारी दिनुपर्ने लामिछानेको जोड छ । मंगलबार बिहान पनि लामिछानेले प्रधानमन्त्री प्रचण्डलाई भेटेर गृहमन्त्री चाहिने अडान राखेका थिए । प्रधानमन्त्री प्रचण्डले रास्वपालाई गृहमन्त्री दिन नसकिने जवाफ पठाएको बालुवाटार स्रोत बत्ताउँछ । राहदानी विवाद र गैरसांसदलाई गृहको चाबी दिन नहुने माओवादीमा आवाज उठेको छ । सरकारको नेतृत्वको गरेको दलसँग प्रभावशाली मन्त्रालय नभएको भन्दै गृह रास्वपालाई दिन नहुने माओवादी नेताहरूको दबाब छ । तर गृह मन्त्रालय नपाए रास्वपाले सरकारबाटै बाहिरिने चेतावनी दिएको छ ।

यस्तो अवस्थामा वर्तमान सत्ता समीकरणमा फेरबदल हुनसक्ने एमालेको आङ्कलन भइरहेको छ । सत्ता गठबन्धनभित्रको सबै गतिविधि कांग्रेसले नियालिरहेको छ । कांग्रेस उपत्यका बाहिर भएका पार्टीका शीर्ष नेतालाई काठमाडौँ बोलाएको छ । कांग्रेस वरिष्ठ नेता रामचन्द्र पौडेल आजै गृह जिल्ला तनहुँबाट काठमाडौँ आउँदै छन् । कांग्रेस सभापति शेरबहादुर देउवाले पार्टीका नेताहरूसँग आन्तरिक छलफल गरिरहेका छन् । कांग्रेस नेताहरू कुनै पनि बेला सत्ता समीकरण फेरबदल हुन सक्ने आशामा छन् ।