काठमाडौं, पुष २३-
अहिले चिसो मौसम छ । चिसो मौसममा शरीरमा विभिन्न समस्याहरु देखा पर्न सक्छन् । जसको कारण रोगब्याधी हुने सम्भावना बढी हुन्छ । त्यसैले जाडो महिनामा बिशेषत स्वस्थ र पौष्टिक खानेकुरा खान सकियो भने चिसो मौसममा हुने विभिन्न सङ्क्रमणबाट जोगिनु का साथै शरीरलाई स्वस्थ र निरोगी राख्न समेत सकिन्छ ।जाडोमा प्राय तात्तातो परिकार खानुमा सबैको रुची हुन्छ । तातो, झोझिलो खानाकुरा कसलाई पो मन पर्दैन र ? यस्तै, मन पर्ने खानामा माछा र माछाबाट बनेका परिकारहरु पनि पर्दछन् । विशेषगरि जाडो महिनामा प्राय सबैको घरमा बेलाबेला माछा पाकेकै हुन गर्दछ । यस्ता छन् माछा खानुका फाइदाहरु :
तनाव व्यवस्थापन
चिसो मौसममा धाम नलाग्ने, वातावरण धुम्म भएको कारण धेरै व्यक्तिहरू यो मौसममा उदास भइरहेका हुन्छन् । द जर्नल अफ साइक्राटिक एण्ड न्युरो साइन्समा प्रकाशित एक शोध अनुसार माछा वा माछाको तेलको नियमित सेवनले मस्तिष्क सम्बन्धी विभिन्न किसिमका समस्याहरू कम गर्छ भनिएको छ ।
आँखालाई पनि फाइदा
आँखाको ज्योतिलाई तेजिलो बनाउने एउटा काम ओमेगा थ्री फ्याट्टि एसिडले पनि गर्छ । एजेन्सी फर हेल्थ केयर रिसर्च एण्ड क्वालिटीका अनुसार माछामा भएको फ्याट्टि एसिडले आँखालाई स्वस्थ बनाउन मद्दत गर्छ भनिएको छ ।
खोकी र ज्वरोसँग लड्न
माछामा पाइने ओमेगा थ्री फ्याट्टी एसिडले फोक्सोमा श्वासप्रश्वासको मात्रालाई बढाउन मद्दत गर्छ । त्यसैले जाडो महिनामा माछाको सेवन गर्ने हो भने फोक्सोमा चिसोले गर्ने सङ्क्रमणलाई कम गर्न सकिन्छ । साथै जाडो महिनामा देखा पर्ने रुघा र अरू सङ्क्रमणबाट समेत जोगाउँछ ।
छालाको समस्या
जाडो महिनामा धेरैलाई छाला सम्बन्धी विभिन्न किसिमका समस्याहरू देखा पर्ने गर्छ । माछामा पाइने ओमेगा थ्री र ओमेगा थ्री फ्याट्टि एसिडले छालालाई राम्रो बनाउन मद्दत गर्छ । यसको सेवनले छालाको बाहिरी भागमा चिसोले पार्ने प्रभावलाई रोकेर छालालाई मुलायम बनाउने काम गर्छ ।
गठियाको समस्या
चिसो मौसममा धेरैलाई हड्डीको गाँठो भएको भागमा सुन्निने समस्या हुन्छ । यो समस्या धेरैलाई दीर्घकालीन रूपमा देखिने गरेको छ । यदि जाडो महिनामा माछाको सेवन गर्ने हो भने यसमा रहेको ओमेगा थ्री फ्याट्टि एसिडले हड्डीको गाँठो सुन्निने समस्यामा समेत कमी ल्याउँछ ।
राम्रो चिल्लो
पोषणविद्हरूका अनुसार माछामा पाइने चिल्लो पदार्थ ९बोसो० मानव शरीरलाई स्वास्थ्य वर्धक मानिन्छ । माछाको सेवनले यसमा रहेको चिल्लो पदार्थ ओमेगा थ्रीले मस्तिष्क र आँखालाई स्वस्थ राख्न मद्दत गर्छ ।
स्वस्थ मुटु
माछामा पाइने चिल्लो पदार्थले मानवको मुटुलाई राम्रो गर्ने विभिन्न अनुसन्धानले प्रमाणित गरिसकेको छ । यदि मुटुको बिमारीले अन्य जनावरको मासु र त्यसको चिल्लो खानु भन्दा सातामा एक पटक माछा खानुलाई राम्रो मानिन्छ ।
भिटामिनको श्रोत
माछामा भिटामिन डी पर्याप्त मात्रामा पाइन्छ । यो बाहेक माछामा धेरै किसिमका पोषक तत्त्वहरू पनि रहेको हुन्छ । माछाको नियमित सेवनले शरीरलाई चाहिने धेरै किसिमका भिटामिनहरू प्राप्त हुन्छ र शरीरमा रोग प्रतिरोधी क्षमताको विकास गर्न मद्दत गर्छ । -एजेन्सी
