२२ मंसिर, काठमाडौं
त्रिभुवन अन्तर्राष्ट्रिय विमानस्थलमा सामान्य अवस्थामा रोकिराखेका जहाजबाट समेत आपत्कालीन अवस्था जनाउने सिग्नल आउन थालेसँगै प्राधिकरणले वायुसेवा कम्पनीहरुलाई सचेत बनाएको छ ।
प्राधिकरणका अनुसार विमानस्थलको पार्किङमा रोकिराखेका जहाजबाट त्रिभुवन विमानस्थलस्थित उद्दार तथा समन्वय केन्द्र ९आरसीसी० मा यस्तो सिग्नल बारम्बार आउन थालेसँगै वायुसेवा कम्पनीहरुलाई सचेत गराइएको छ । प्राधिकरणले अघिल्लो साता सबै वायुसेवा कम्पनीलाई यसबारे सचेत गराउँदै सूचना निकालेको छ ।
प्राधिकरणका एक अधिकारीका अनुसार वायुयानमा रहेको यस्तो सूचना दिने डिभाइसलाई पाइलटले थिच्दा आपत्कालीन सूचना दिने सिग्नल सेन्टरमा पुग्ने गर्छ । यस्तो सिग्नल आउँदा सेन्टरले जहाजको अवस्थाबारे तत्काल सोधखोजमा लाग्नु पर्ने हुन्छ । तर, पछिल्लो समय जहाज सरसफाइका क्रममा सफाइ कर्मचारीबाट त्रुटिबस यो डिभाइस थिचिंदा आपत्कालीन अवस्थाको सिग्नल सेन्टरमा पुग्ने गरेको हो ।
विमानस्थलमा रहेको सेन्टरमा भारतको बैंग्लौरस्थित स्याटलाइटले स्थान ‘लोकेट’ गरेर जहाजबारे सूचना पठाउने गर्छ । तर, कुनै पनि समस्या नै नरहेका जहाजबाट बारम्बार यस्तो सिग्नल आएपछि प्राधिकरणले वायुसेवा कम्पनीहरुलाई गम्भीर हुन सचेत गराएको हो । ईएलटीको सहायताबाट जहाज दुर्घटनामा परेमा त्यसको अवस्थिति पत्ता लगाउन सहयोग गर्छ । यो सिग्नल सक्रिय हुनु यात्रु र जहाज गम्भीर अवस्थामा छन् भन्ने अवस्थाको जनाउ हो ।
प्राधिकरणको फ्लाइट सेफ्टी स्टाण्डर्ड डिपार्टमेन्टले भुलवश सो डिभाइस थिचिएको भए त्यसबारे तत्काल सूचना दिन समेत भनेको छ । साथै यस्तो घटना भएमा आन्तरिक अनुसन्धान गरी तीन दिन भित्र प्रतिवेदन बुझाउन समेत विभागले सचेत गराएको छ ।
