काठमाडौं, मंसिर १५-
केही समययता कोरोना भाइरससँग मिल्दोजुल्दो लक्षण भएका बिरामीको सङ्ख्या बढ्न थालेको छ ।
चिसो बढेसँगै रुघाखोकी, घाँटीको खसखस, मौसमी फ्लु र छातीमा चिसो गडेका बिरामी बढेका छन् । अहिले अस्पतालमा उपचारमा पुग्ने केहीमा निमोनियासमेत देखिएको छ ।
रुघाखोकीलाई सामान्य रुपमा लिँदा कतिपयलाई जटिल समस्या देखिन थालेको छ । दुई–चार दिनपछिसम्म पनि रुघाखोकी र ज्वरो ठिक नभए उपचारका लागि अस्पताल जान डाक्टरहरुको सुझाव छ ।
चार पाँच दिनसम्म पनि रुघाखोकी र ज्वरो निको नभए स्वास्थ्यमा जटिल समस्या देखिने भएकाले तुरुन्त स्वास्थ्य जाँच गराउनु पर्छ । रुघाखोकीलाई पचाइन्छ भनेर लापरबाही गर्न नहुने चिकित्सकहरु बताउँछन् ।
वायु प्रदूषण र चिसोका कारण जाडोयाममा निमोनियाको जोखिम धेरै हुन्छ । डाक्टरका अनुसार मौसमी रुघाखोकीको लक्षण सामान्यतया एक हप्तामा आफैँ हराएर जान्छ भने केहीमा भने जटिल समस्या देखिन्छ ।
सामान्य भनेर रुघाखोकीलाई बेवास्ता गरे बूढापाका, दीर्घरोगी, क्यान्सर, रोग प्रतिरोधक क्षमता कम भएका मधुमेहका बिरामी र बालबालिकाको भने ज्यान जाने जोखिम हुन्छ ।
मौसमी रुघाखोकीका लक्षण भएकाहरू सकेसम्म अरूको सम्पर्कबाट दूरी बनाएर बस्ने, खोक्दा हाच्छ्युँ गर्दा मुख छोप्ने र मास्क लगाउने गरे सङ्क्रमण फैलन पाउँदैन । मौसमी फ्लु र रुघाखोकीको सङ्क्रमणबाट जोगिन मास्क लगाउनुका साथै सरसफाइ र चिसोबाट बच्नु पर्ने डाक्टरको भनाइ छ ।
ज्वरो, रुघाखोकी, घाँटीको खसखसलगायत लक्षण भएकाहरूले तागतिला मनतातो झोलिलो पदार्थ खाएर र न्यानो भएर घरमै आफ्नो हेरचाह गर्न सक्छन् । तर, यसरी बसेको ७२ घण्टासम्म पनि कम नभए भने अस्पताल जानु पर्ने डाक्टरको सुझाव छ ।
चिसो र मौसमी फ्लुबाट जोगिन तानो न्यानो कपडा लगाउन, मन तातो पानी र झोलिलो पदार्थ खान, हरियो सागसब्जी र फलफूल खान डाक्टरको सल्लाह छ ।
तर फ्रिजमा राखिएका खानेकुरा नतताइ खानु हुँदैन । यस्तै, जाँड रक्सी र सुर्ती चुरोट पनि नखान डाक्टरको आग्रह छ ।
