खोटाङ, कात्तिक २३-
नेपाली कांग्रेसले खोटाङ प्रदेशसभा (क) मा स्वतन्त्र उम्मेदवारी दिएका महाधिवेशन प्रतिनिधि धर्मराज पोखरेललाई निष्कासन गरेको छ ।
आसन्न ४ मंसिरमा हुने निर्वाचनमा गठबन्धनका साझा उम्मेदवारविरुद्ध स्वतन्त्र उम्मेदवारी दिएका पोखरेललाई मंगलबार केन्द्रीय अनुशासन समितिले पाँच वर्षका लागि साधारण सदस्यसमेत नरहने गरी निष्कासन गरेको हो ।
पार्टीको आधिकारिक उम्मेदवारविरुद्ध उम्मेदवारी दिने, त्यस्ता उम्मेदवारको प्रस्तावक वा समर्थक बसेका ७४ जनामाथि कारबाहीमा पर्दा पोखरेल पनि निष्कासनमा परेका हुन् ।
गठबन्धनको सिट बाँडफाँड र टिकट वितरणप्रति असन्तुष्टि जनाउँदै प्रतिनिधिसभा सदस्यमा स्वतन्त्र उम्मेदवारी दर्ता गरेका कांग्रेसका पूर्वराज्यमन्त्री सर्वधन राई र प्रदेशसभा ९क०मा उम्मेदवारी दर्ता गरेका कांग्रेस खोटाङका पूर्वसभापति सुवासकुमार पोखरेलले उम्मेदवारी फिर्ता लिए पनि पोखरेलले उम्मेदवारीलाई निरन्तरता दिएका थिए ।
प्रतिनिधिसभा सदस्यमा गठबन्धनबाट माओवादी केन्द्रका रामकुमार राई र प्रदेशसभा ‘क’मा एकीकृत समाजवादीका वीरबलकाजी राई उम्मेदवार छन् ।
एक प्रतिनिधिसभा र दुई प्रदेशसभा रहेको जिल्लामा प्रतिनिधिसभा वा दुई प्रदेशसभामध्ये एक पाउनुपर्ने माग सुनुवाइ नभएको भन्दै कांग्रेस नेता पोखरेलले प्रदेशसभा ‘क’मा स्वतन्त्र उम्मेदवारी दिएको बताएका छन् ।
गठबन्धनले चुनावी कार्यक्रम गरिरहँदा स्वतन्त्र उम्मेदवार पोखरेल पनि धारा चुनाव चिन्ह लिएर घरदैलोमा व्यस्त छन् । राप्रपा पृष्ठभूमिका पोखरेल कांग्रेसका पूर्वजिल्ला उपसभापति पनि हुन् ।
सुरुमा स्वतन्त्र उम्मेदवारी दिनका लागि पोखरेललाई उक्साउने अधिकांश कांग्रेस नेता भने गठबन्धनको चुनावीसभामा हिँड्न थालिसकेका छन् ।
