काठमाडौं, २१ असोज-
प्रमुख प्रतिपक्षी दल नेकपा एमालेले सुदूरपश्चिम प्रदेशका १५ निर्वाचन क्षेत्रमा संघीय निर्वाचनका लागि उम्मेदवार तोकेको छ । नेकपा एमालेका अध्यक्ष केपी शर्मा ओलीले सुदूरपश्चिमका १५ निर्वाचन क्षेत्रका उम्मेदवारको नाम तय गरेका हुन् ।
जसअनुसार मंसिर ४ गते हुने संघ र प्रदेशसभाको निर्वाचन अन्तर्गत नेकपा एमालेले बझाङमा ऐन महर, दार्चुला गणेश ठगुन्ना र बैतडीमा दामोदर भण्डारी लाई उम्मेदवार बनाएको छ । त्यस्तै डोटीमा गौरी ओली र बाजुरामा कर्णबहादुर थापा प्रतिनिधिसभाको लागि उम्मेदबार बन्ने भएका हुन् ।
यता अछाम १ मा नेकपा एमालेका नेता भीम रावलले टिकट नपाउने भएका छन् । अध्यक्ष केपी शर्मा ओलीको कडा आलोचक तथा १० औं महाधिवेशनमा अध्यक्ष पदका प्रतिस्पर्धी रावलले अछाम १ मा एमालेबाट प्रतिनिधिसभातर्फको टिकट नपाउने भएका हुन् ।
अछाम जिल्ला कमिटीले रावलको नाम सर्वसम्मत एकल सिफारिस गरेको थियो । १० बुँदेमार्फत् एमालेमा रहेकोभन्दै अध्यक्ष ओलीले प्रतिशोध साँधेर टिकट नदिएको रावल निकट नेता बताउँछन् ।
रावलको ठाउँमा झपट बोहरा अब प्रतिनिधिसभाको चुनाव लड्ने भएका हुन् । यस्तै अछाम २ मा यज्ञ बोगटी, कञ्चनपुर–१ बाट तारा लामा, २ बाट नरबहादुर धामी र ३ बाट निरु पालले टिकट पाएका छन् । कैलाली १ मा टपेन्द्र रावल, २ मा झपट रावल, ३ मा गौरीशंकर चौधरी, ४ मा लेखराज भट्ट, ५ मा नारदमुनि रानालाई उम्मेदवार बनाइएको छ ।
त्यसैगरी नेकपा एमालेले डडेल्लधुरामा उम्मेदवारी नदिने निर्णय गरेको छ । वर्तमान प्रधानमन्त्री तथा नेपाली कांग्रेसका सभापति शेरबहादुर देउवाकोविरुद्धमा नेकपा एमालेले उम्मेदवार नउठाउने भएको हो । एमालेले डडेल्धुरामा कांग्रेस बीपीका वरिष्ठ उपाध्यक्ष कर्ण मल्ललाई समर्थन गर्ने भएको छ ।
प्रदेशसभातर्फ ‘क’ का लागि पठानसिंह बोहोरा र ‘ख’ मा गजेन्द्र शाहीलाई उम्मेदवार बनाउने निर्णय एमालेले गरेको छ।
