काठमाडौं , २ असोज –
नेकपा एमालेका अध्यक्ष केपी शर्मा ओलीले निलम्बित प्रधानन्यायाधीस चोलेन्द्र सम्सेर जबराले सफाइ पाइसकेको दाबी गरेका छन् ।
आइतबार बालकोटमा बसेको एमाले केन्द्रीय सचिवालय बैठकपछि सञ्चारकर्मीहरूसँग कुरा गर्दै अध्यक्ष ओलीले गठबन्धनले प्रक्रिया अघि नबढाएर सफाइ दिएको बताएका हुन् ।
‘संसदको कार्यकाल सकियो । महाभियोगको प्रस्ताव पारित भएन । दर्ता भयो र पारित भएन भने कुरा सिद्धियो । त्यसमा सत्ता पक्षले उहाँलाई ढिलो गरेर सफाइ दियो । प्रक्रिया अघि नबढाएर सफाइ दियो ।’ ओलीले भने ।
ओलीले प्रधान्यायाधीशमाथि गठबन्धनले सत्ताको दुरुपयोग गरेको आरोपसमेत लगाए । उनले रुसी शासकले अदालतमाथि गोलाबारुद गरेको भन्दै अहिले पनि त्यस्तै अवस्था देखिएको बताए ।
‘सत्तामा पुगेर सेना प्रहरी हातमा लिएर जे पनि गर्ने ? घर घेरेर नजरबन्दमा राख्ने ?’ ओलीले भने, ‘अहिलेको सरकारले प्रधानन्यायाधीशलाई त घेर्छ भने संसदका कर्मचारीलाई के गर्छ ?’
संसदमा महाअभियोग प्रस्ताव दर्ता भएपछि जबरा निलम्बनमा परेका थिए । गएराति १२ बजेबाट संसदको कार्यकाल सकिएपछि महाअभियोग निस्क्रिय भएको जनाउँदै उनले आजबाट काममा फर्कने तयारी गरेका थिए ।
तर, सरकारले भने उनलाई काममा फर्किन नदिन ठूलो संख्यामा सुरक्षाकर्मी उनको निवासमा खटाएको थियो र उनलाई घरबाट बाहिर निस्कन दिइएन । यसैबीच राष्ट्रिय मानवअधिकार आयोगको टोली उनको निवासमा पुगेको थियो ।
