चितवन, भदौ १९ –
चितवन निर्वाचन क्षेत्र नं. ३ बाट चितवनका युवा व्यावसायी चन्द्रविलास अधिकारीले स्वतन्त्र उम्मेद्वारी दिने घोषणा गरेका छन् ।
चितवन क्षेत्र नं. ३ नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ को निर्वाचन क्षेत्र हो । प्रचण्डले यसपालीको चुनावमा पनि आफू सोही क्षेत्रबाट उठ्ने घोषणा गरिसकेका छन् ।
सोही क्षेत्रबाट युवा व्यावसायी चन्द्रविलासले स्वतन्त्ररुपमा उम्मेद्वारी दिने भएका हुन् । चितवन आजसँग कुरा गर्दे चन्द्रविलासले सो क्षेत्रबाट चुनाव लड्ने बताए ।
सफल युवा व्यावसायी चन्द्रविलासले देशको विकासका लागि व्यावसायिक अनुभव बटुलेका युवाहरु पनि राजनीतिमा आउनुपर्ने सोचेर उम्मेद्वारी दिन लागेको बताए । देशमा हाल शिक्षा र स्वास्थ्य क्षेत्रमा निकै नै सुधार चाहिएकाले त्यसका निम्ति आफ्नो उम्मेद्वारी रहने चन्द्रविलास बताउँछन् ।
आफू जनप्रतिनिधि भएपछि देशमा शिक्षा र स्वास्थ्य क्षेत्रमा सुधार गर्न, निशुल्क स्वास्थ्य र शिक्षाको व्यवस्था गर्नका निम्ति संसद भवनमा आफूले निरन्तर आवाज उठाइरहने र त्यसका निम्ति आफ्नोतर्फबाट सक्दो पहल गर्ने चन्द्रविलासले चितवन आजलाई बताए ।
आफू एक्लैले प्रचण्डसँग चुनाव लड्ने आँट नगरेको बताउँदै उनले चितवनका अधिकांशा शैक्षिक व्यक्तित्वहरुको आफूलाई समर्थन रहेको दाबी गरे । सम्पूर्ण व्यावसायि, युवायुवतीसहित क्षेत्र नम्बर तीनका आम जनताले आफूलाई भोट दिएर जिताउनेमा आफू विश्वस्त रहेको चन्द्रविलासको भनाइ छ ।
चन्द्रविलासले आफू चुनाव उठ्ने कुरा सामाजिक सञ्जालमार्फत पनि जानकारी गराएका छन् । हेर्नुहोस्, भिडियो ।
