रसुवा, साउन ३-
रसुवागढी नाकाबाट आर्थिक वर्ष २०७८र७९ मा ३ सय ९१ टन चिनियाँ खाद्य सामग्रीको आयात भएको छ ।
नाकाबाट सामग्रीको आयात अनियमित भएको भए पनि खाद्य सामग्रीको आयातमा भने केही वृद्धि भएको हो । अघिल्लो आर्थिक वर्षको तुलनामा गएको आर्थिक वर्षमा आयात बढेको खाद्य अनुसन्धान अधिकृत नवीन देउजाले बताउनुभयो ।
अघिल्लो आर्थिक वर्ष २०७७ र ७८ मा २ सय ७ टन चिनियाँ खाद्य सामग्री आयात भएको थियो । खाद्य आयात तथा निर्यात गुणस्तर प्रमाणीकरण कार्यालय रसुवाको अनुसार नेपालमा रहेका चिनियाँ नागरिकले चिनियाँ खाद्य सामग्रीको प्रयोग गर्ने गरेका छन् ।
आर्थिक वर्षको साउनदेखि असार मसान्तसम्म सबैभन्दा बढी फल तथा सागपातजन्य सामग्रीको आयात बढी भएको छ । जसमा सोया सस तथा अचार छन् । यो १ सय १५ टन आयात भएको छ ।
कार्यालयको तथ्याङ्क अनुसार फल तथा सागपातजन्य १ सय १५ टन, खाद्यान्न दलहन तथा अन्य ४६ दशमलव ९ टन, मसलाजन्य १५, माछा तथा मासुजन्य २६ दशमलव ७५, दूध तथा दूग्धजन्य ८ दशमलव १५, वनस्पति घ्यूजन्य २०, चिया तथा कफीजन्य ५१ दशमलव ०५ टन, माछाको अचार १४ दशमलव ४ टन र बदाम, सिजनिङ पाउडर, अजिनामोटो, रेड विन पेष्ट, डोमालगायतका १०७ दशमलव ७७ टन खाद्य सामग्री आयात भएको हो ।
चीनबाट सोया सस, भिनेगर, अचार, पीठो, सिन्के चाउचाउ, सिजनिङ पाउडर, छुर्पी, डोमा, भोटे चिया, चिकेन सुप, भेजिटेबल सुप, रेड विन पेष्ट, चामल आदि सामग्रीको आयात हुने गरेको छ । खाद्यान्न दलहन तथा अन्य प्रकारका सामग्रीको आयात बढी हुने गरेको कार्यालयले जनाएको छ ।
अहिले एकद्वार प्रणाली लागू भएपछि इम्पोर्ट पर्मिट नलिएकाहरूको सिष्टमले नै भन्सार गर्न नमिल्ने भएकोले परीक्षण गर्नेको सङ्ख्या पनि बढेको छ ।
रसुवागढी नाकाबाट आयात भएका चिनियाँ खाद्य सामग्रीको नमुना परीक्षण बढेको छ । कार्यालयले साउनमा ३१, भदौमा २८, असोजमा ३५, कार्तिकमा ६, मंसिरमा २८, पुसमा २५, माघमा ४६, फागुनमा ७१, चैतमा २७, वैशाखमा ६, जेठमा १३ र असारमा ४९ थान खाद्य सामग्रीको नमुना परीक्षण गरिएको जनाएको छ ।
कार्यालयले २०७५ माघदेखि चीनबाट आएका खाद्य सामग्रीको नमुना परीक्षण गर्दै आएको छ । कोभिड–१९ भन्दा पहिले दैनिक २ सय ५० वटाभन्दा बढी गाडी आवतजावत गर्ने गरेका थिए ।
