करिब १०० भन्दा बढी सर्जकको सहभागिता रहेको यस उत्सवमा रचना वाचनसँगै कार्यपत्र प्रस्तुति र काव्य विमर्श समेटिएको थियो । लेखक भूपिन खड्काले ‘नेपाली पर्यटन काव्य, सम्भावना र चुनौती’ विषयमा अवधारणापत्र प्रस्तुत गर्नुभएको थियो । भूपिनको अवधारणापत्रको मूल आशय पर्यटन र काव्यबीचको गहिरो सम्बन्ध स्थापित गर्दै ‘पर्यटन काव्य’लाई सम्भावनायुक्त नयाँ साहित्यिक विधाका रुपमा प्रस्तुत गर्नु रहेको छ ।

भूपिनले मानव सभ्यताको विकास नै यात्रा र गतिशीलतासँग जोडिएको देखाउँदै पर्यटनलाई जीवनको स्वाभाविक र आवश्यक गतिविधि मान्नुभएको छ । उहाँले अवधारणापत्रमार्फत नेपालमा पर्यटन काव्यसम्बन्धी अध्ययन, विमर्श र कार्यक्रमहरु अझै न्यून रहेको उल्लेख गर्दै यस क्षेत्रमा थप पहल आवश्यक रहेको औंल्याउनुभएको छ । समग्रमा पर्यटन काव्यले साहित्य र पर्यटन दुवैलाई समृद्ध बनाउने पुलको काम गर्न सक्छ भन्ने निष्कर्ष उहाँको थियो ।

भूपिनको अवधारणापत्रमाथि विवेचना गर्दै नियात्राकार प्रतीक ढकालले नेपालको पर्यटन उद्योगको चर्चा अन्तर्राष्ट्रियस्तरमा सम्मानपूर्वक हुने गरेको बताउनुभयो । हाम्रो हावापानी र भूबनोटसँग हामीले गर्व गर्नुपर्ने ढकालको तर्क थियो । वीरेन्द्र बहुमुखी क्याम्पसका सह–प्राध्यापक रमेशकुमार श्रेष्ठले गैँडाकोटले गरेको काव्य उत्सवले साहित्यिक जमघटसँगै पर्यटन र संस्कृतिको प्रवर्द्धन गर्ने सशक्त मञ्चका रुपमा स्थापित गरेको बताउनुभयो ।

समालोचक उदय अधिकारीले २०२२ सालमा डुङ्गामा गरिएको साहित्यिक कार्यक्रमको परम्परालाई पुनर्जीवित गर्दै गैँडाकोट प्रज्ञा प्रतिष्ठानले निरन्तरता दिएको बताउनुभयो । काव्यवाचन कार्यक्रममा घनश्याम परिश्रमी, विदुर अधिकारी, गोविन्द अर्याल, नीमा पौडेल तिवारी, होमनाथ घिमिरे, राधा कोइराला, बालकृष्ण थपलिया, एलबी क्षेत्री, लेखराम सापकोटालगायतका एक सय बढी स्रष्टाले कविता, गजल, गीतमार्फत आफ्ना सिर्जना प्रस्तुत गर्नुभएको थियो ।

गैंडाकोट नगर प्रज्ञाप्रतिष्ठानका कुलपति गोविन्दराज विनोदीले फरक किसिमको काव्य उत्सवमा उत्साहजनक सहभागिता देखेर खुसी लागेको बताउनुभयो । जलयात्रा सकिएपछि कविहरु गैँडाकोटमा रहेको केबलकारमार्फत मौलाकालिका मन्दिर पुगेर कालिका भगवतीको दर्शन गरी देवघाटधाम, गैँडाकोट र चितवनका सुन्दर दृश्यावलोकन गरेका थिए । रासस