नवलपुर, १ फागुन :
नवलपरासी (बर्दघाट–सुस्तापूर्व)को गैँडाकोटमा पाँचौं गैँडाकोट मेयर कप राष्ट्रिय टी–ट्वान्टी प्रतियोगिता सुरु भएको छ । आजदेखि सुरु भएको प्रतियोगिताको उद्घाटन खेलमा आयोजक गैँडाकोट मेयर्स ११ ले विजयी शुरुआत गरेको छ ।
गैँडाकोट–९ स्थित नवजागरण खेलकुद मैदानमा आज दिउँसो भएको उद्घाटन खेलमा गैँडाकोट मेयर्स ११ ले कर्णाली प्रदेश विरुद्ध ६ विकेटले जित हासिल गरेको हो । कर्णालीले दिएको १२० रनको चुनौती मेयर्स ११ ले १० दशमलव तीन ओभर खेल्दै चार विकेटको क्षतिमा पूरा ग¥यो । यसअघि टस हारेर ब्याटिङको निम्ता पाएको कर्णालीले १९ दशमलव चार ओभर खेल्दै १० विकेटको क्षतिमा ११९ रन बनाउन सफल भएको थियो ।
मेयर्स ११ को जितका लागि सन्नि बिकले ३१ बलमा चार छक्का र आठ चौका सहित ६३ रनको योगदान दिए । त्यस्तै दीपक बोहोराले १८ बलमा दुई छक्का र चार चौकासहित ३० रन बनाउन सफल भए । प्रतियोगितामा गौरव विश्वकर्मा र अविशेक थापाले अविजित आठ रनको पारी खेले ।
प्रतियोगितामा कर्णालीका खेलाडी अर्विन्द घर्ती मगरले दुई तथा दीवान पुन र राजप्रसाद शाहले एक/एक विकेट लिन सफल भए ।
सुरुआती ब्याटिङमा उत्रिएको कर्णालीका ब्याटर मनिष थापाले २३ बलमा दुई छक्का र तीन चौकाको सहायताले ३१ रनको योगफल तयार पारे । त्यस्तै राजप्रसाद शाहले २०, दिवन पुनले १४, दीपेन्द्र रावतले १२ तथा हिमांशु शाहीले १२ रनको योगफल तयार पार्दा अन्य ब्याटरहरुले दोहोरो अङ्क जोड्न सकेनन् ।
कर्णालीलाई सस्तैमा समेट्ने क्रममा चन्द्रकान्त पौडेलले तीन तथा अविनाश गौतमले दुई विकेट लिए । उद्घाटन खेलको उत्कृष्ट खेलाडी (म्यान अफ द म्याच) मेयर्स ११ का सन्नित विक घोषित भए ।
प्रतियोगिताको उद्घाटन गैँडाकोट नगरपालिका प्रमुख मदनभक्त अधिकारीले प्रतियोगिताले स्थानीय खेलाडीलाई अवसर प्रदान गर्दै गैँडाकोटको पहिचान राष्ट्रिय तथा अन्तर्राष्ट्रिय स्तरमा विस्तार गर्ने विश्वास व्यक्त गरे । कार्यक्रममा नेपाल क्रिकेट सङ्घ गण्डकीका उपाध्यक्ष प्रकाश पौडेलले गैँडाकोटमा विगतदेखि सञ्चालन भइरहेको मेयरकप स्थानीय प्रतिभा उजागर गर्ने महत्वपूर्ण मञ्चका रूपमा स्थापित हुँदै गएको बताए ।
गैँडाकोट नगर खेलकुद विकास समितिका अध्यक्ष तथा टुर्नामेन्ट डाइरेक्टर धामनाथ सापकोटाले प्रतियोगिता सञ्चालनका लागि ५२ लाख रुपैयाँ खर्च हुने अनुमान गरिएको बताए । मेयर कपलाई निरन्तरता दिँदै गैँडाकोटलाई राष्ट्रिय खेलकुद गतिविधिको केन्द्रका रुपमा विकास गर्ने आफूहरुको लक्ष्य रहेको उनको भनाइ छ । यहाँ सुरु भएको क्रिकेट प्रतियोगिता स्थानीय युवालाई प्रतिभा प्रदर्शन गर्ने अवसर दिनुका साथै खेलकुद पर्यटन प्रवद्र्धनमा पनि टेवा पु¥याउने बताए ।
जिल्लाकै ठूलो धन राशिको राष्ट्रिय टी–ट्वान्टी क्रिकेट प्रतियोगितामा सात प्रदेशबाट सात वटा तथा आयोजक एक गरी आठ वटा टिमको सहभागिता रहेको छ । प्रतियोगिताको विजेताले उपाधिसहित रु तीन लाख तथा उपविजेताले रु दुई लाख पुरस्कार पाउनेछन् । प्रतियोगिता आयोजक संस्था नवजागरण ग्रामीण विकास केन्द्रका अध्यक्ष रामचन्द्र सापकोटाका अनुसार प्रतियोगिताको म्यान अफ दी सिरिजले रु २५ हजार, उत्कृष्ट ब्याटर, बलर, फिल्डर तथा किपरले रु १५ हजारका दरले पुरस्कार पाउने छन् ।
त्यस्तै, बेस्ट क्याच अफ दी टुर्नामेन्टले रु १० हजार, प्रत्येक खेलको म्यान अफ दी म्याचले रु पाँच हजार एवम् नव प्रतिभा खेलाडीलाई विशेष प्रोत्साहन पुरस्कार प्रदान गरिने सापकोटाले जानकारी दिए ।
प्रतियोगिताअन्तर्गत फागुन २ गते बिहान १० बजे लुम्बिनी प्रदेश र बागमती प्रदेशबीच प्रतिस्पर्धा हुनेछ भने दिउँसो १ बजे मधेश प्रदेश र गण्डकी प्रदेश बीच प्रतिस्पर्धा हुने सापकोटाले बताए । प्रतियोगिताको फाइनल खेल फागुन ५ गते हुने जनाइएको छ ।
